Қостанай облысында санитарлық бекеттер қойылады

12 қарашадан бастап Қостанай облысының периметрі бойынша санитарлық бекеттер орнатылады, - деп хабарлайды Tengrinews.kz тілшісі.

Қостанай облысының шекараларында санитарлық бекеттер қойылып, мониторинг топтарының жұмысы күшейтіледі.

Жедел штабтың отырысында Қостанай облысының басшысы Архимед Мұхамбетов коронавирус инфекциясының таралуын болдырмау жөніндегі жұмысты күшейтуді тапсырды.

Қала мен аудан әкімдерінің есептерін тыңдағаннан кейін 12 қарашада сағат 00.00-де облыстың периметрі бойынша санитарлық бекеттер қойылып, мониторинг топтарының жұмысын күшейту туралы шешім қабылданды. Бұған дейін санитарлық посттар тек Қостанай, Жітіқара қалаларының шекараларында және Ресеймен шекарада қойылған еді.

Өңірде күн сайын коронавирус инфекциясының саны өсіп жатыр, кейінгі тәулікте Қостанай облысында COVID-19 жұқтырған 63 адам тіркелген болатын.