Нұрсұлтан Назарбаев Михаил Горбачевті 90 жылдық мерейтойымен құттықтады, деп хабарлайды Skifnews.kz ақпарат порталы.
Елбасының құттықтау хаты Қазақстанның Ресейдегі елшілігінің желідегі парақшасында жарияланды.
Құттықтау хатта КСРО экс-президентінің мемлекеттік қызметі үлкен құрметке лайық екені жазылған.
"Әлем тарихына едәуір әсер еткен үлкен өзгерістер сіздің есіміңізбен байланысты. Мерейтойыңызды күш-қуатыңыз сарқылмаған күйде қарсы алып, қажетті қоғамдық, гуманитарлық және ағартуға қатысты жобаларды жүзеге асырып, жұмысты жалғастырып жатқаныңыз қуантады. Біздің достық әрі сенімді қарым-қатынасты жоғары бағалаймын", - делінген мәтінде.
Сондай-ақ Елбасы Горбачевке жазған хатында оған денсаулық, бақ-береке тілеген.
Естеріңізге сала кетейік, Михаил Горбачев 1931 жылы 2 наурызда Ставрополь өлкесінде туған. Ол 1978-1985 жылдары КОКП орталық комитетінің хатшысы, 1985-1991 жылдары комитеттің бас хатшысы болған.