$ 447.4 € 477.55 ₽ 4.76
Нұр-Сұлтан қаласында COVID-19 инфекциясын жұқтырған науқастарды емдеуге арналған реанимациялық және инфекциялық төсек-орындар саны түгесілуге жақын. Бұл туралы қалалық Қоғамдық денсаулық сақтау басқармасынан мәлімдеді, деп хабарлайды ҚазАқпарат елорда әкімдігіне сілтеме жасап.
Қаланың бас дәрігерлері күн сайынғы жиналыста КВИ бойынша эпидемиологиялық жағдайды талқылайды. Елордада коронавирус инфекциясын жұқтырғандар санының өсуіне байланысты стационарларда қосымша төсек-орындар ашылатын болады.
«Қалада тәулігіне вирусты жұқтырудың 300-ге тарта жағдайы тіркеледі. Қазіргі уақытта стационарларда 451 адам емделіп жатыр. Төсек жүктемесі 63% құрайды. Жалпы, Нұр-Сұлтан КВИ-мен ауыратын науқастарды емдеу үшін 5 мың төсек-орынға дейін әрі оған қаланың барлық медициналық ұйымдарын жұмылдыруға дайын. Бірақ азаматтар санитарлық нормаларды сақтамайтын болса жұмсалатын ресурстардың бәрі жетпейтін болады. Егер осылай жалғаса берсе, біз коронавирус індетінің үшінші толқынына тап болуымыз мүмкін», - деп атап өтті Нұр-Сұлтан қаласының Қоғамдық денсаулық сақтау басқармасынан.
Мәлім етілгендей, қазіргі уақытта №3 көпбейінді балалар ауруханасында төсектер орналастырылған және мерекеден кейін эпидемиологиялық жағдайға байланысты науқастар Травматология ғылыми-зерттеу институтына орналастырылатын болады.
Елордалық дәрігерлердің айтуынша, науқастардың өсуі азаматтардың алдын алу шараларын сақтамауынан болып отыр.
«Статистикаға көз жүгіртсек, инфекцияның өсуі наурыз айының алғашқы мерекелерінен кейін болып отыр. Қала тұрғындары 8 наурыз мейрамын тойлау кезінде жұрт көп жиналатын орындарда маска режимін сақтамаған. Енді біз азаматтарға алдағы Наурыз мейрамын тойлаудан бас тартуды, қонақ шақырып немесе қонаққа барудан бас тартуды ұсынамыз. Инфекциялық стационарлардың төсектері күн сайын толып жатыр. Егер осылай жалғаса берсе, дабыл қағуымызға тура келеді!» - деп толықтырды ведомстводан.
