«Кеш емес»: Павлодар облысында 80 жастағы әжей күйеуге шықты

Павлодар облысында биыл некеге тұрған жұбайлар арасындағы ең үлкен қалыңдықтың жасы белгілі болды. Бұл туралы өңірдегі департамент басшысы Жақан Жәкенов мәлімдеді деп жазады pavlodarnews.kz сайтына сілтеме жасаған KAZ.NUR.KZ.

"Биыл қарым-қатынасын заңмен реттеп, некеге тұрған қалыңдықтардың арасында 80 жастағы әжей кездесті. Ол күйеуге шыққан қалыңдықтардың арасындағы ең үлкені. Ал ең үлкен күйеу жігіт 84 жаста", - деді Жәкенов.

Сондай-ақ, департамент басшысы өңірдегі ең жас келіндерге де тоқталып өтті. "Ең жас келіндердің жасы 16-да. Өңірдегі үш қыз бала осы жасында күйеуге шығып отыр. Екі күйеу жігіт 17 жаста", - деді ол.

Брифинг барысында АХАТ органдарының Павлодар облысында 1735 некені тіркегені расталды. Сонымен қатар, ажырасушылар саны да анықталды. Жыл басынан бері өңірде 449 жұп ажырасып кеткен.

2021 жылдың қаңтар-мамыр айларында 4677 нәресте дүниеге келді, олардың 2378 - і ұлдар. Демек, 100 қызға 103 ұл. - 3741 адам қайтыс болды, қайтыс болғандардың ішінде ерлердің үлес салмағы 51,3% - ды құрады. Өлім себептерінің арасында қан айналымы жүйесі ауруларынан – 22%, тыныс алу органдары ауруларынан – 10,7%, рак ауруынан – 9,5% болатын өлім-жітім басым болып отыр, - деп толықтырды Жақан Жәкенов.