Қазақстандық дәрігер Алматы-Анталья ұшағында қарт әйелдің өмірін сақтап қалды

Әуе кемесінің бортындағы ғажайып оқиға туралы Алматы қаласының тұрғыны, блогер Александр Цой Facebook парақшасында жазды.

"Достар, танысыңыздар, бұл – Эльмира Әлиева. Мамандығы бойынша 15 жылдық тәжірибесі бар онколог-маммолог. Сонымен қатар, әдемі әйелі және үш баланың анасы. 28 тамызда ол отбасымен Алматыдан Анталияға "Turkish Airline" авиакомпаниясымен ұшып келді. Ұшудың үшінші сағаты басталғанда, жолсеріктер дүрбелең көтере бастады, ал ұшқыш борттан дәрігер іздеп, хабарлама жасады. Біздің қарт отандасымыздың бірі ауырып қалыпты. Оның жүрек соғысы жиілеп, қолы жансызданып, тұншыға бастады", - деп жазды ол.

Эльмира көмекке бірінші болып ниет білдірген. Әуе кемесінің экипажынан тонометр мен пульсоксиметрді алып, дәрігер қысымның жоғарылағанын, ал сатурацияның төмен болғанын анықтады.

Мәселенің мәнін түсінген Эльмира Әлиева бірден әйелге қысымды төмендетуге арналған препарат берді, тыныс алу үшін баллонға оттегі маскасын қосып, науқасқа қол массажын жасай бастады.

"Эльмира ұшудың қалған төрт сағатында да науқастың қасында болды. Ұшақ қауіпсіз жерге қонған кезде оларды жедел жәрдем күтіп тұрды. Дәрігерлер науқасты тексеріп, қиын сіт артта қалғанын анықтады", - деді Александр Цой.

Науқасты тексергеннен кейін түрік дәрігерлері оны ауруханаға жатқызуға себеп таппады. Әйел өзін жақсы сезінгендіктен, оған тікелей қонақүйге баруға рұқсат берді.

"Міне, біздің елімізде осындай батырлар-дәрігерлер бар. Сізге бас иеміз, Эльмира. Батылдығыңыз пен кәсібилігіңіз үшін рахмет!",- деп қорытындылады Александр Цой.