Павлодарда гараждан үш адамның мәйіті табылды

Павлодар қаласындағы Мир көшесінде орналасқан гараж боксында әйел мен екі ер адамның мәйіті табылды. Сотқа дейінгі тергеу ерлі-зайыптылардың автокөлік жөндеумен айналысқан гаражды жалға алғанын анықтады. Бұл туралы Azattyq Rýhy.

«Ерлі-зайыптылар жұмыс орнында болған кезде оларға отбасылық досы келгені белгілі болды. Барлығы бірге гаражда ішімдік ішкен, суыта бастаған соң Mercedes Benz маркалы автокөлікті іске қосып, ұйықтап қалған. Мәйіттерді көрші гараждың жалға алушысы тапты, ол бұл туралы полицияға хабарлады. Гараждың іші автокөліктің газ құбырынан шыққан тұншықтырғыш газға толы болған. Жүргізілген сот-медициналық сараптамаларға сәйкес, үш адамның өлімі улы газбен улану салдарынан болған», – деді Павлодар облысы Полиция департаменті бастығының орынбасары Рашад Өтеуов.

Тәртіп сақшысы Гагарин көшесінде орналасқан гараж кооперативінің боксындағы ер адам да осындай қайғылы жағдайдан көз жұмғанын жеткізді.

«14 қарашада бір ер адам полицияға қоңырау шалып, жағдайды хабарлаған. Оқиға орнына келген полицейлер облыс орталығының 44 жастағы тұрғынын ВАЗ-21150 маркалы автокөлігінен тапты. Қазіргі уақытта сот-медициналық сараптама тағайындалды», - делінген ІІМ хабарламасында.

Айта кетейік, мәйіттер табылған кезде гараждағы көліктер жұмыс істеп тұрған.

«Кез келген көлік жүргізушісі қауіпсіздік шараларын байыппен қабылдауға міндетті. Газбен уланудың алдын алу үшін жүргізушілер көліктің газ шығару жүйелерінің жұмысқа жарамдылығын, олардың герметикалығын ұдайы тексеріп отыруы тиіс», – деді Рашад Өтеуов.