Алматыда мүгедек балаға күтім жасау мерзімін 16 жастан 18 жасқа дейін ұзартылды

Алматы қаласы бойынша Еңбек, әлеуметтік қорғау және көші-қон департаментінің басшысы Мұрат Мұратбеков Өңірлік коммуникациялар қызметінің брифингінде жәрдемақының жаңа түрін енгізу туралы айтты, деп хабарлайды Skifnews.kz ақпарат порталы.

Ол «Қазақстан Республикасының кейбір заңнамалық актілеріне азаматтардың жекелеген санаттарын әлеуметтік қорғау мәселелері бойынша өзгерістер мен толықтырулар енгізу туралы» ҚР Заңына сәйкес ерекше қажеттіліктері бар баланы күту кезеңін 18 жасқа дейін ұзарту туралы шешім қабылданғанын хабарлады. Мұратбековтің пікірінше, бұл жасына байланысты зейнетақы мен базалық зейнетақы тағайындауға оң әсер етеді.

Заңда мүгедектігі және асыраушысынан айырылу жағдайы бойынша жәрдемақыларды бір мезгілде алу құқығын беру көзделеді. Бұл асыраушысынан айырылған және құрамында мүгедек балалары бар отбасылардың табыс деңгейін арттыруға ықпал етеді.

- Бұрын мүгедектігі бар балалар ата-аналары ажырасқан кезде бір мезгілде алимент және мүгедектігі бойынша жәрдемақы ала алатын. Алайда, бір немесе екі ата-ана қайтыс болған жағдайда, бала мүгедектігі бойынша жәрдемақы ғана немесе асыраушысынан айырылу бойынша жәрдемақыны алатын. Екі жәрдемақыны бір мезгілде алу бойынша заңды құқық болған жоқ. Осы норманың енгізілуіне байланысты Алматыда ерекше қажеттіліктері бар 290 бала асыраушысынан айырылу бойынша қосымша 12 063 теңгеден 29 500 теңгеге дейін жәрдемақы алу құқығына ие болды, - деп хабарлады М. Мұратбеков.

Сондай-ақ мемлекет мүгедек балаларды тәрбиелеп отырған отбасылардың бала кәмелетке толғаннан кейін тұрғын үйге кезекте тұру құқығын сақтау туралы қамқорлық жасады. Спикер атап өткендей, іс жүзінде отбасылар 10 жылға дейін тұрғын үй кезегінде тұр. Бұрын кәмелетке толған балалар кезекке қайта тұруға мәжбүр болды. Бұл норма елдегі 20 мыңнан астам отбасына баспана кезегін сақтауға мүмкіндік береді деп болжануда.