Мемлекет басшысы Қасым-Жомарт Тоқаев Есеп комитетінің төрағасы Наталья Годунованы қабылдады, - деп хабарлайды Tengrinews.kz тілшісі Ақорда сайтына сілтеме жасап.
Президент Қасым-Жомарт Тоқаевқа пандемиямен күреске бөлінген 521 миллиард теңге көлеміндегі қаражаттың жұмсалуына жүргізілген тексерудің алдын ала нәтижелері ұсынылды.
Атап айтқанда, аталған аудит аясында модульді ауруханалардың құрылысына, жұқпалы аурулар стационарларын материалдық-техникалық тұрғыдан жабдықтауға бөлінген қаржы, сондай-ақ жеке қорғаныс құралдарын сатып алу шығындары тексерілді.
Сонымен қатар Наталья Годунова Президентке Токиода өткен 2020 жылғы Олимпиада ойындарының дайындығына бөлінген қаражатты пайдалану тиімділігіне жүргізілген мемлекеттік аудиттің нәтижелері туралы баяндады.
Спорт комитетінде жүргізілген тексеріс барысында дене шынықтыру және спортты дамыту саласындағы іс-шараларға, оның ішінде 2020 жылғы Олимпиадаға дайындыққа және оған қатысу үшін жұмсалған 125 миллиард теңге көлеміндегі қаржыға аудит жүргізілген.
Кездесу қорытындысы бойынша Мемлекет басшысы тиісті тапсырма берді.
Sn.kz порталының басқа да маңызды жаңалықтарын Instagram, Telеgram, facebook, twitter және vk секілді әлеуметтік желідегі парақшаларымыздан оқи аласыздар.