Жаңаөзендегі митинг: Қоғамдық штаб Маңғыстау халқына үндеу жолдады

ҚР Парламент Мәжілісінің депутаттары Еділ Жаңбыршин мен Самат Мұсабаев бастаған бір топ азаматтың видеосы жарияланды. Видеодағы мәлімет бойынша, Маңғыстау өңірінен шыққан бір топ азамат сұйытылған мұнай газының бағасын реттеу үшін құрылған Үкімет комиссиясымен бірге жұмыс істеп, елдің талабын жеткізуге атсалыспақшы.

Фото: ашық дереккөз

Маңғыстау облысының бірнеше азаматы сұйытылған мұнай газының бағасын реттеуге атсалысатын қоғамдық штаб құрылғанын мәлімдеді.

«Қадірлі маңғыстаулықтар!
Сұйытылған газ бағасының Маңғыстауда күрт өсуіне байланысты халық наразылығын білдіруде. Ел өзінің уәжін билікке жеткізіп,талаптарының орындалуын сұрауда. Бұл, дұрыс деп есептейміз. Осы мәселеге байланысты Маңғыстаудың бірнеше азаматтары қоғамдық штаб ұйымдастырды. Штаб мүшелері осы ауылдың өзіміз танитын жігіттерінен құралып отыр. Әлеуметтік желілерден және тікелей телефонымызға Маңғыстаудың азаматтары шығып осы іске араласуды сұрауда. Елдің бірлігі,халықтың тыныштығы, Маңғыстаудың амандығы барлығымыздың ортақ абыройымыз, ағайын! Қоғамдық штабтың негізгі мақсаты - елдің талабын үкімет комиссиясына жеткізіп,сұйытылған мұнай-газ мәселесін шешуге атсалысу. Біз, осыған жұмыстанамыз!», - деді Мәжіліс депутаты Еділ Жаңбыршин аталмыш видеода.

Қоғамдық штабтағы азаматтардың нақты тізімі мынадай:

Жаңбыршин Еділ - ҚР Парламент мәжілісінің депутаты,
Мусабаев Самат - ҚР Парламент мәжілісінің депутаты,
Өрісбаев Аббат- Маңғыстау облыстық мәслихатының депутаты,
Сүгірбай Аят- Маңғыстау облыстық мәслихатының депутаты,
Ерсайынұлы Уәйс - Ақтау қалалық мәслихатының депутаты,
Бимағамбет Әнуар - ақын, журналист,
Алмас Алтай - журналист.

Sn.kz порталының басқа да маңызды жаңалықтарын Instagram, Telеgram, facebook, twitter және vk секілді әлеуметтік желідегі парақшаларымыздан оқи аласыздар.