$ 449.3  489.69  4.89

Онлайн казино мен букмекерлерді жою туралы петиция құрылды

Құмар ойындар еліміздегі жанұя институтын бұзады.

Мәслихат депутаты, кәсіпкер Қайрат Құдайберген құмарлыққа шақыратын букмекерлер мен онлайн казиноларды жабуды ұсынды. Ол аталған іске қатысты петиция құрып, қол жинауды бастап кетті. Қасым-Жомарт Тоқаевқа жолдаған видео-үндеуінде Қайрат Құдайберген бұл мәселені қолға алып, шешіп беруді өтінді, деп хабарлайды Stan.kz ақпарат агенттігі.

"Өкінішке қарай, сіз-біздеп шырылдап жүрген мәселе бей-жай қалып отыр. Бұл онлайн казино, букмекерлер бинго, алаяқтардың өтірік ойнау платформалары, ойын құмарлыққа шақыратын, техникалық тұрғыда заңсыз, лицензиясы жоқ осындай ойындарды көріп отырмыз", - дейді депутат.

Құдайберген бұған дейін де петиция құрып, қол жинап, президентке жолдағанын айтады. Алайда әзірге бұл сұрақ назардан тыс қалып отыр, дейді кәсіпкер. 

Айтуынша, құмар ойындар еліміздегі жанұя институтын бұзады. 

"Қаншама отбасылар ажырасып жатыр, адамдар өзіне қол жұмсап жатыр, қарызға батып, біреудің өмірімен ойнап жатқан ойын құмарлардың, казинолардың қалтасын толтырып жатыр. Елімізден миллиардтаған ақшалар басқа елдің офшорлық зонасына, банктеріне кетіп жатыр. Бұған қарайтын құзырлы органдар қазіргі таңда ештеңе естімейтін, көрмейтін, бұл туралы айтпайтын ұйымдарға айналды", - дейді Құдайберген. 

Депутат букмекерлер мен онлайн казинолардың жарнамасы "жер жаратынын" айтып ашынды. Әсіресе, спортты насихаттайтын арналардың құмар ойынды қолдап отырғаны өкінішті, дейді ол. 

"Ең намысқа тиетін нәрсе, үлкен сайттар, YouTube, телеарна болсын, спортты насихаттайтын біздің ұлттық телеарналар осы букмекерлердің жарнамасына қарқын беріп отыр. Бұл - нағыз ұят, намыссыздық. Елімізді алдап жүрген букмекерлердің ақшаларын алып, спортқа салу. Меніңше, спортқа салатын ақшасы 5 пайыз, ал 95 пайызы біреудің қалтасын толтырып жатыр. Бұл ақша - қарапайым халықтың ақшасы", - дейді Құдайберген. 

"Ел ағасы ретінде осы сұрақты қолға алып, шешуіңізді сұраймыз", - деп президентке өтінішін айтты депутат.

Құдайберген бұл мәселеге бей-жай қарамайтын адамдарды петицияға қол қоюға шақырды. Ол қазірдің өзінде 21 мыңнан аса қол жинап үлгерген. 

Sn.kz порталының басқа да маңызды жаңалықтарын InstagramTelеgramfacebooktwitter және vk секілді әлеуметтік желідегі парақшаларымыздан оқи аласыздар.

Сіздің реакцияңыз?
Ұнайды 0
Ұнамайды 0
Күлкілі 0
Ашулы 0

Серіктес жаңалықтары