Қаңтар оқиғасында қаза тапқан тергеу изоляторы қызметкерінің отбасына баспана берілді

Алматы облысында қасіретті қаңтар оқиғасы кезінде ауыр жарақат алып, бақилық болған ҚАЖ қызметкерінің отбасына баспана берілді, – деп хабарлайды Zakon.kz.

Алматы облысының әкімі Қанат Бозымбаев екі бөлмелі пәтердің кілтін Алматы облысы бойынша Қылмыстық-атқару жүйесі департаментінің ЛА-155/16 мекемесінің қызметкері әділет прапорщигі Ербол Ержановтың жақындарына табыстады.

Пәтерді бергенде не қуанарымды не жыларымды білмедім. Өзі көрмей кетті. Кілтті өз қолына бергенде бұл жағдай мулдем басқаша болар еді ғой деген арман мен өкініш бар. Бірақ Алланың жазғанына қарсы келмейміз. Шүкіршілік айтамын. Ерболдың көрмеген жақсылығын артта қалған көзіміздің ағы мен қарасындай ұлым мен қызым көрсін. Балаларын аманат қылып тастап кеткен Аллам маған денсаулық берсін деп тілеймін. Енді бұндай кайғылы, қаралы қаңтар айй болмасын. Отбасы шайқалмасын. Еліміз тыныш болсын. ҚАЖ департаментіне қарасты ЛА-155/16 мекемесінің қызметкерлеріне көмектерін көрсетіп жатқандары үшін үлкен рақметімді айтамын, – деді марқұмның жұбайы Гүлім Ержанова.

Ішкі істер органдарының қызметкерлері қызмет борышы бойынша әрдайым қылмысқа қарсы күрестің және азаматтардың қауіпсіздігін қамтамасыз етудің алдыңғы қатарында. Ербол Ержанов ішкі істер органдарында 1999 жылдан бастап қызмет атқарады. Ол жас қызметкерлерге тәлімгер болды және екі баланы тәрбиелеп отырған кәсіби, адал қызметкер ретінде көпке үлгі болды.

Біздің әріптесіміз Ербол Ержанов жаппай тәртіпсіздік кезінде қызмет барысында қаза тапты. Өмірінің соңғы сәтіне дейін Отанға, халқына деген адалдығын абыроймен көрсетті, – деп атап өтті ҚАЖД бастығының орынбасары Жаныбек Қосжанов.

Sn.kz порталының басқа да маңызды жаңалықтарын Instagram, Telеgram, facebook, twitter және vk секілді әлеуметтік желідегі парақшаларымыздан оқи аласыздар.