Ақтауда жалақыны көтеруді талап еткен металлургтер ереуілге шықты

Ақтауда металлургтер бас көтерді. «ArcelorMittal Tubular Products Aktau» АҚ жұмысшылары ел Президентінің атына жалақыны 100% арттыруды талап ететін бейнеүндеу жолдады. Бұл туралы Маңғыстау облысының әкімдігі мәлім етті, деп хабарлайды Azattyq Rýhy.

«ArcelorMittal Tubular Products Aktau» АҚ мұнай-газ саласына арналған болат құбырлар шығаруға және тау-кен өндіру өнеркәсібінде пайдаланылатын магистралды су таратқыштарды, жылу трассаларын және пульпо/шлам құбырларын салуға маманданған.

Жұмыс беруші компанияның мәліметіне сәйкес, 120 жұмысшы жалақыны көтеруді талап еткен және өз талаптары орындалмайтынын айтып, жұмысты тоқтатқан.

Айта кетейік, бұған дейін «ArcelorMittal Tubular Products Aktau» АҚ қызметкерлері кәсіпорын директорына жалақыны 100% арттыру талабымен хат жолдаған болатын. Кәсіпорын директоры бұл хатты жалақыны көтеру мүмкіндігі мәселесін келісу үшін «ArcelorMittal Temirtau» АҚ акционеріне жіберген. Бүгінгі күнге дейін бұл мәселе өз шешімін таппады.