Ақтөбеде сатушылардың бірі қанттың қапшығына тары салып сатқан (ВИДЕО)

Ақтөбеде қала тұрғыны шекер деп сатып алған 2 қаптың ішінен тары шықты. Алданғанын ол үйіне келгенде бір-ақ білген. Ал, қантты Ресейден әкелмек болғандар оны шекарада жерге төгіп жатыр. Себебі, кеден қызметі өткізбейді. 

Сайттардың бірінде жарияланған видеода ақтөбелік тұрғын дүкеннен қапшықтап қант алғанын айтады. Қолында 50 келі тарысы бар тұрғын енді алдандағанын қалай дәлелдейтінін білмей дал. Себебі, шекер сатып алғанын растайтын түбіртекті сақтамағанмын дейді.

Ал, Станислав есімді азамат Ресейден жүк тасиды. Ол апта бұрын Екатеринбург қаласында үйіне 5 келі шекер сатып алған. Бағасы - 67 рубль, біздің ақшамен 514 теңге. Алайда, шекараға келгенде тауарды тастап кетуге мәжбүр болған.  

Станислав ЛЕВАНДОВСКИЙ, АҚТӨБЕ ҚАЛАСЫНЫҢ ТҰРҒЫНЫ:

Орск шекарасында ресейлік кеденшілер қантты ел аумағынан шығаруға тыйым салынғанын айтып, шекерді төк деді. Амал жоқ, қоқыс жәшігіне тастап кеттім. Бұрын 5 келі қантты өткізуге рұқсат беретін еді, қазір мүлдем өткізбейді. Бұл дұрыс емес деп санаймын. Себебі, қантты сату үшін әкеле жатсам екен, олай емес. Мен өзім үшін 5-ақ келі алдым. Неге өткізбеске? Ақтөбеде супермаркеттерде шекердің бір келісі 441 - 489 теңгенің аралығында сатылып жатыр. Бірақ, бір адамға үш келіден артық берілмейді. Оның өзін түске дейін алып үлгеру керек. Түстен кейін сөрелер босап қалады. Үй жанындағы шағын дүкендерде қанттың бағасы 750 теңгеден жоғары.  Кей дүкендер қымбат шекерді сатудан әлдеқашан бас тартқан. Ал, билік өкілдері қалаға вагон-вагон қант әкелініп жатқанын жеткізді.

Нұрхан ТІЛЕУМҰРАТОВ, АҚТӨБЕ ОБЛЫСТЫҚ КӘСІПКЕРЛІК БАСҚАРМАСЫНЫҢ БАСШЫСЫ:

Өңірге өткен айда 60 вагондай қант келді. Ол 4 мың тоннадан астам. Осы айға ірі сауда желілері 30 вагонға конртактқа қол қойып, өткен аптаның басынан 10 вагон қант жіберілді. Үшеуі келді, жетеуі жолда келе жатыр. Сонымен қатар, тұрақтандыру қорында 70 тоннаға жуық қант бар. Ол әлеуметтік дүкенде, коммуналдық базарда төмендетілген бағамен 363 теңгеден сатылуда. Аймаққа тонналап жеткізіліп жатқан тәтті ұнтақ не себепті халыққа жетпей жатқаны белгісіз. Бұл мәселе енді 31-тамызда Ресейдің сыртқа қант шығармау туралы шектеуі күшін жойған соң, шешіліп қалуы мүмкін дейді үмітін үзбеген бұқара.

Дереккөз: astanatv.kz