Елімізде 15 ірі құрылыс компаниясы пәтер бағасын өзара келісіп негізсіз қымбаттатқан

Бәсекелестікті қорғау және дамыту агенттігі еліміздегі құрылыс нарығында қымбатшылықтың қолдан жасалып отырғанын хабарлады. Елдегі 15 ірі құрылыс компаниясы пәтерлердің бағасын негізсіз 20 пайызға қымбаттатқан. Олардың 14-і әкімшілік жауапкершілікке тартылса, біреуіне қатысты тергеу жүріп жатыр. 

 Өзара келісе отырып, баспана бағасын қымбаттатқан компаниялар арасында белгілі «Базис-А» мен «Bi Group», Астана қаласындағы «Орда Строй Групп» ЖШС, Шымкенттегі «Отау Строй» ЖШС және «Достық Инвест групп» ЖШС. Сондай-ақ, Қарағанды, Ақтөбе және Шығыс Қазақстан облыстарында да бірқатар ірі құрылыс компаниялар бар.

"Оларға тұрғын үй нарығында бағаны белгілеу және (немесе) қолдау бөлігінде бәсекелестікке қарсы келісілген іс-әрекеттерден көрінеді. Бұл компаниялардың атына бәсекелестікті қорғау саласындағы заңнаманы бұзу белгілерін жою және бағаны төмендету қажеттілігі туралы хабарламалар жіберілді. Оның 14-і орындалды"- делінген ведомство сайтындағы хабарламада. 

Елордадағы “Орда Строй Групп” серіктестігі, агенттіктің ескертуіне құлақ аспағандықтан, қазір тергеу жүріп жатыр. Ал қалған құрылысшылар ескертуден кейін баспана бағасын 15-20 пайызға төмендеткен.

Нақты айтар болсақ, РАМС-Қазақстан компаниялар тобы Алматыдағы бірқатар тұрғын үй кешендерінің бағасын 15%-ға немесе шаршы метрі 90 мың теңгеге төмендетті. Шымкентте DOSTYK INVEST GROUP пен «Отау групп» 300-ден 270 мың теңгеге дейін төмендетті. Өскемендегі «Достар май» компаниясы тұрғын үйдің жайлылығы мен қабаттылығына байланысты шаршы метрді 350 мың теңгеден 220-280 мыңға дейін түсірді, - дейді тұрғын үй бағасының төмендеу мысалдарын келтірген агенттік.