Жаңалықтар 07.08.2022 сағат 03:45

Ақмоладағы үш ауылдың атауы қазақшаланады

Аймақта алдағы жылдары 100-ден астам елді мекеннің атауы өзгереді деген жоспар бар.
Бөлісу
Бөлісу
Бөлісу

Ақмола облысына қарасты Сандықтау ауданындағы үш бірдей ауылдың атауы биыл қазақшаланады. Сөйтіп, Кеңес үкіметі кезіндегі ескі атаумен аталып келе жатқан елді мекендер жаңаша сипатқа ие болмақ. Бұл өзгерісті жергілікті тұрғындар толық қолдаған, деп хабарлайды 24kz.

Айта кетейік, аймақта алдағы жылдары 100-ден астам елді мекеннің атауы өзгереді деген жоспар бар. Аймаққа халқының ұйымшылдығы және береке-бірлігімен танымал Красная поляна ауылы биыл ақмолалықтарды тағы бір жағымды жаңалығымен қуантты. Олар қатар қонған үш ауылдың атауын қазақшаламақ. Жаңадан таңдалған атаулар да мағыналы әрі әдемі естіледі.

Ансар Ибаев, Бірлік ауылдық округінің әкімі:

- Красная поляна біздің орталығымыз әрі береке-бірлігіміздің нышаны болғандықтан біз оны Бірлік деп атауды жөн көрдік. Ал Петриковка – Тұмар, Арбузенка – Ақкент боп өзгереді. Барлығы да халықпен кеңесе отырып таңдалды. Бұл кезінде ата-бабаларымызды бауырына басқан қазақ халқына деген құрметіміз және отансүйгіштігіміздің белгісі деп білерсіздер.

Аталған үш ауылда 1 мыңнан астам халық тұрады. Олардың 99 проценті ингуштар мен шешендер. Ауылдықтардың негізгі кәсібі мал шаруашылығы. Мұнда 6 ірі серіктестік пен 40 шақты шаруа қожалығы бар. Бір сөзбен айтсақ, жұмыссыз жүрген адам жоқ. Ал Бірлік ауылдық округі ақсақалдар алқасы бар облыстағы саусақпен санарлық елді мекендердің бірі. Сондықтан мұнда қандай мәселе болмасын қариялардың қарауынан өтеді.

Магумад Умаров, Красная Поляна ауылының тұрғыны:

- Ауылдың атауын өзгерту деген осыдан 30 жыл бұрын болуы тиіс шара еді. Бірақ сәті биылға келген екен. Әлі де кеш емес. Халықтың бәрі қолдап отыр. Біз бұл мәселені соңғы рет 2015 жылы бір көтергенбіз. Алайда атауларды ауыстыруға мораторий жарияланып, бастамамыз сол күйі қалып қойған болатын. Енді біздегі оң өзгерістер басқа ауылдарға да үлгі болса дейміз.

Жергілікті әкімдік ауылдардың атауын өзгертіп ғана қоймай, оларды ажарландыруға да мықтап кіріскен. Мәселен, өткен жылдары мұнда елді мекендердің жарық желісі жаңартылса, алдағы жылдары ауыз су құбыры тартылып, көшелер күрделі жөнделмек. Осылайша облыс орталығынан 150 шақырым жерде жатқан ауылдықтар ««Жаңа Қазақстанға»  толық дайынбыз» деп әзілдейді.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар