Атырауда мұнай өнімдерін ұрлағаны үшін сотталған депутат ақталып шықты

Атырау облыстық сотының қылмыстық істер жөніндегі сот алқасы апелляциялық тәртіпте облыстық мәслихаттың Amanat партиясы атынан сайланған экс-депутат Абзал-Сенбі Самаликовқа және тағы 18 адамға қатысты №2 қалалық соттың үкімін өзгертті.

Атап айтқанда, апелляциялық сот Самаликов пен Мақат локомотив депосының есепшісі Ақмаржан Жұмашеваны ақтап шықты.

Оларға басқалармен бірге ұйымдасқан қылмыстық топты ұйымдастырды және мұнай өнімдерін ұрлады деген айып тағылды. Сотталғандардың барлығы дерлік Мақат локомотив депосында жұмыс істеген және бастапқы үкім бойынша тепловоздардан дизель отынын ұрлаған.

Тергеу және бірінші сатыдағы сот үкіміне сәйкес, 19 адам қатысқан қылмыс 2020 жылдың қаңтар-желтоқсан айлары аралығында жасалған. Осы уақыт ішінде олар 300 тоннаға жуық дизель отынын ұрлап, жалпы сомасы 63 миллион теңгеден астам сомада Мақат локомотив депосына зиян келтірген.

Экс-депутат Абзал-Сенбі Самаликов пен «Мақат» локомотивінің есепшісі Ақмаржан Жұмашева ҚР Қылмыстық кодексінің 371-бабының 2-бөлігі («Салғырттық») бойынша кінәлі деп танылып, екі жылға бас бостандығын шектеу жазасына кесілді. Жалпы 15 адам нақты мерзім, қалғандары бас бостандығын шектеу жазасын алды.

Облыстық соттың баспасөз қызметі хабарлағандай, іс сотталғандар мен олардың адвокаттарының апелляциялық шағымдары бойынша қаралды. Олар ұйымдасқан қылмыстық топ құрды, оған басшылық етті және оған қатысты деп айыпталған және ұрлық дерегі бойынша сотталғандарды ақтауды, отбасылық жағдайы мен денсаулық жағдайын ескере отырып, жазасын жеңілдетуді сұрады.

Самаликов пен Жұмашеваға дизельдік отын шығындары туралы жүкқұжаттарына қол қоюда өздерінің лауазымдық міндеттерін тиісінше орындамады деп тағылған айып расталмады.

- Лауазымдық нұсқаулыққа сәйкес, Самаликов пен Жұмашеваның жүкқұжаттардың дұрыс толтырылуына жауапты емес екені анықталды. Аталған құжаттардың толтырылуына жауапкершілік техникалық бөлім басшысына жүктелген. Ол көрінеу жалған мәліметтер жазылған жүкқұжаттарды рәсімдегені үшін сот үкімі бойынша кінәлі деп танылды. Самаликов басшы ретінде дизель отынының ұрлануына жол бермеу үшін барлық шараны алған: тепловоздарға ағызуға қарсы құрылғы орнатқан, тепловоздарға сервистік қызмет көрсететін кәсіпорынға үндеу хаттар жазған, делінген облыстық соттың баспасөз қызметінің хабарламасында.

Самаликов пен Жұмашева іс-әрекеттерінде қылмыстық құқық бұзушылықтың болмауына байланысты ақталды.

Дереккөз:  Ақ жайық басылымы.