Қаржылық мониторинг агенттігі Павлодар облысы бойынша департаментінің қызметкерлері жедел іздестіру іс-шаралары барысында АИ-95 маркалы бензинді ел аумағынан заңсыз әкету әрекетінің жолын кесті. Бұл турады ведомство өкілдері мәлім етті.
«Көлемі – 280 тонна, құны – шамамен 90 миллион теңге болатын жанар май құйылған 5 вагон-цистерна ұсталды. Оларды жанар май қоспасы деген желеумен Өзбекстанға алып кетпек болған.
Мамандардың қорытындысына сәйкес, теміржол цистерналарынан алынған сынамалар К-4 экологиялық класындағы АИ-95 бензині болып шықты.
Белгілі болғандай, келісім шарт бойынша шетел компаниясының пайдасына елден жалпы сомасы 45 миллион долларға 50 мың тонна экспорттау жоспарланған», - делінген ресми хабарламада.
Тергеу жалғасып жатыр. Тергеу мүддесіндегі басқа ақпарат жария етілмейді.