Бас прокуратура Челахтың ісімен танысуға кірісті

Қазақстан Республикасының Бас прокуратурасы Владислав Челахтың қылмыстық ісін оның президентке жазған өтініші мен тергеуді қайта бастау туралы өтінішінен кейін зерттеу үшін сұратып алғанын мәлімдеді, деп хабарлайды Zakon.kz.

Редакция Владислав Челахтың өтініші жөнінде жолдаған сауалға берген жауапта атап өтілгендей, Қылмыстық-процестік кодексінің 486-бабына сәйкес, бас прокуратура сотталушының арызын тексеру мақсатында қылмыстық істі сұратып алды.

"Сотталғанның уәждері Қазақстан Республикасының "Прокуратура туралы" Конституциялық заңында және Қылмыстық-процестік кодексінде белгіленген тәртіппен тексеріледі", деді 2-қызмет басшысының орынбасары Р.Дубаева.

22 желтоқсанда Владислав Челахтың өтініші Бас прокуратураға түскені белгілі болды.

Бұған дейін ол Қазақстан президенті Қасым-Жомарт Тоқаевқа ісі бойынша тергеуді жалғастыруды және одан жауап алуды сұраған еді. Тұтқында отырған Челах қайғылы оқиғаның мән-жайын айтып беруге дайын екенін жеткізді.

2012 жылғы мамыр айының соңында "Арқанкерген" уақытша шекара заставасының байланысы тоқтап, ол жерге басқа заставадан шекара наряды жіберілді. Келген шекарашылар казарманың ғимараты өртеніп кеткенін, оның ішінде 14 мәйіт жатқанын анықтады. Сондай-ақ жақын маңдағы аңшылар үйінен қорықшының денесі табылды.

Бірнеше күннен кейін тірі қалған жалғыз шекарашы, 19 жастағы қатардағы сарбаз Владислав Челах ұсталды. Алғашында ол әріптестері мен аңшыны өлтіргенін мойындады, бірақ кейін бұл айғақтарынан бас тартты.

2012 жылғы 11 желтоқсанда қылмыстық істер жөніндегі ауданаралық мамандандырылған әскери сот оны өмір бойына бас бостандығынан айыру жазасына кесті.

Кейін Челах ісін Жоғарғы соттың кассациялық сатысында қарау туралы өтініш берді. Ол өмір бойына бас бостандығынан айыру жазасын алып тастауды және құқығын бұзғаны үшін 30 миллион теңгені өтеуді, істі қосымша тергеуге жіберуді сұрады. Ол БҰҰ комитетінің оған қатысты Азаматтық және саяси құқықтар туралы халықаралық пактінің 14-бабы бұзылды деген шешімін негізге алды. Алайда оның өтініші қабылданбады.