Вице-премьер Ақтөбедегі 10 пәтерінің қайдан келгенін түсіндірді

Премьер-министрдің орынбасары – Сауда және интеграция министрі Серік Жұманғарин үкімет отырысында Ақтөбеде құны 1 миллион доллар тұратын 10 пәтер пара түрінде берілгені туралы ақпарат құралдарында жарияланған ақпаратқа түсініктеме берді, деп хабарлайды Zakon.kz.

Серік Жұманғарин сұрақтан қашпай, мән-жайға тоқталды.

"Интернет-арна таратқан ақпаратқа сүйенсек, бұл жала жабу және фактілерді бұрмалау. Қазір менің отбасымның адвокаттары сотқа шағым түсіріп жатыр".

Бұл ретте ол мемлекеттік қызметке 35 жылдан кейін келгенін, 90-шы жылдар мен 2000-жылдардың ортасына дейін, оның айтуынша, өзі құрған бизнес құрылымда жұмыс істегенін еске алды.

"Бұл үйлерді менің отбасыма тиесілі кәсіпкерлік құрылымдар салған, бұл жерде бұрын Ақтөбеде ескі орман шаруашылығы болған, оны біз сатып алғанбыз, 2007 жылы сол жерде тұрғын үй кешенін салуды бастадық, өкінішке орай, дұрыс емес уақыт болды – 2007 жыл. Естеріңізде болса, ипотекалық дағдарыс болды, ол жерде үлкен қаржы ресурстары жұмсалып, құрылысты тоқтатуға тура келді, ал жалпы алғанда компания ол кезде біршама қиын жағдайда болды, несиелік жүктеме үлкен болды", деді Серік Жұманғарин.

Нәтижесінде, Жұманғарин 2011 жылы мемлекеттік қызметтен кетуге мәжбүр болғанын атап өтті.

"Мен жағдайды ретке келтіру, компанияларды қайта құрылымдау, қарыздардан құтылу, осы үйлерді бітіру мақсатында белгілі бір уақытқа кетіп қалдым. 2012 жылы мен инвестициялық компания құрдым, инвестиция тарттым, соның ішінде өзімнің қаржымды қосып, осы үйлерді бітірдік. Бірақ, өкінішке орай, адамдардың қалауы өзгерді. Бұл үлкен аумақтар болды, ал ол кезде адамдарға олар қажет емес еді. Бұл 2007 жылдан 2012 жылға дейін, біріншіден, ұзақ мерзімді құрылыс, екіншіден, бұл пәтерлер ол кезде сатылмады. Ал 2016 жылы компанияға түсетін салмақ өте үлкен болғандықтан, заңды тұлғаларға түсетін салықтар мүлде басқа, олар бірнеше есе жоғары болғандықтан, салық салуды оңтайландыру үшін осы пәтерлерді өз меншігіне беруге шешім қабылданды, бұл жерде ешқандай қылмыс жоқ", деді ол.

Бұл пәтерлердің кімге тиесілі екендігі туралы журналистердің нақтылаған сауалына ол: «Иә, бұл біз салған пәтерлер, 6-7 жыл бойы сатылған», - деп қысқаша жауап берді.