$ 445.66 € 474.58 ₽ 4.78
Күні кеше Алматыдағы қоғамдық көліктерде жол жүру құны 150 теңгеге дейін көтерілген болатын. Бірақ, бұл баға баршаға емес, тек «Оңай» картасын сатып алмаған тұрғындарға ғана қатысты. «Оңайы» бар жолаушылар болса ескі тарифте есептесуін жалғастыра бермек. Жергілікті билік бұл ақпаратты алдын ала халыққа ескерткенімен, жолақы қымбаттаған күні жолаушылар тарапынан наразылықтар байқалды. Әсіресе, көңілі толмағандар әлеуметтік желілер арқылы өз қарсылықтарын білдіріп жатты.
Алматы қалалық Жолаушылар тасымалы және автомобиль жолдары басқармасының басшысы Мақсұт Исахов болса тілшілерге берген сұхбатында тұрғындарға алаңдаудың қажеті жоқтығын айтады. Өйткені, жол ақысының тарифін өсіргендегі мақсат – халықтың қалтасын қағып алу емес.
– Біздің негізгі мақсат – 150 теңге арқылы елдің қалтасын қағу емес, оларды жаппай электронды төлем жүйесіне әкелу. Оның бірнеше пайдасы бар. Қолма-қол ақша жинағанда, біз тасымалдаушылардың қанша табыс табатынын білмейміз. Сол себепті, оларға жалақы және автопарктердегі проблемаларды шешу туралы нақты талаптар қоя алмаймыз. Электронды карта осы мәселелерді шешеді деген ойдамыз, – дейді басқарма басшысы.
Оның айтуынша, электронды карта жүйесін енгізу арқылы автопарктерді жаңартуға да мүмкіндік туады. Ал, бұл өз кезегінде жолаушылардың өзіне қолайлы болмақ.
Жаңа ереже бойынша, бірегей төлем картасымен 10 рет үздіксіз қатынаған жолаушының келесі жолақысы 70 теңгеге түседі. Қала билігі қоғамдық көліктердегі баға саясатын оңтайландыру арқылы көлеңкедегі қаржы айналымын заңдастырмақшы. Бұл бастаманың оң нәтижесі алғашқы жарты күнде-ақ байқалған. Жолаушылар тасымалы және автомобиль жолдары басқармасының басшысы 1 тамыз күні электрондық билет жүйесімен төлеу 48 пайызға артқанын айтады. Оған дейін бір күнде 26 млн. теңге жиналып келсе, сол күні түскі сағат 14.00-ге дейін 23 млн. теңге қазынаға түскен.
Жаңа ереженің бір жақсысы, билет берілмеген жағдайда жолаушының тегін жүретін құқығы бар. Бірақ, бұл тәсіл автобус жүргізушілері мен кондукторларға қиындық келтірмекші. Өйткені, электронды билетке арналған терминалдардың жиі істен шығу жағдайлары тіркелетіндіктен, олар «Оңай» картасы бар елді тегін тасимыз деген қауіптері барын жасырған жоқ.
Бұл тариф әзірге қала сыртына қатынайтын көліктер мен метроға ене қоймады. Дегенмен, айналадағы ауылдарға баратын жолаушылардың жолақысы осы жылдың күз-қыс айларына қарай «қалалық деңгейге» көтерілмекші. Бұдан бөлек, жолақыны СМС арқылы бұрынғы бағасымен төлеуге болатынын ескерген жөн.
Қоғамдық көліктерге тексеріс жасау алдағы айларға дейін созылмақ. Яғни, жолақысын төлемеген жолаушылар 4 жарым мың, ал дұрыс билет бермеген тасымалдаушылар 11 мың теңгеге дейін айыппұл төлейді.
– Соңғы уақытта «Оңай» картасынан ақшам жоғалды» деген адамдар көп болып кетті. Шынында, картадағы ақша ешқайда кетпейді. Тіпті, осы жөнінде сенімсіздік туып жатса, «Оңай» жүйесінің арнайы сайтына кіріп, жеке кабинет арқылы оны «Телеграм» әлеуметтік желісіне тіркеп қоюға кеңес беремін, – дейді Алматы қалалық Жолаушылар тасымалы және автомобиль жолдары басқармасының басшысы Мақсұт Исахов.
