«160 мың теңгедей белгіленеді»: министр көпбалалы отбасына төленетін жәрдемақы туралы айтты

Бала саны 7-ден асатын отбасыларға төленетін мемлекеттік жәрдемақының мөлшері өседі. Бұл туралы Еңбек және халықты әлеуметтік қорғау министрі Біржан Нұрымбетов айтты, деп хабарлайды Sputnik.

Айта кетсек, жаңа жылдан бастап еліміздегі көпбалалы отбасыларға табысына қарамастан, ай сайын мемлекеттік жәрдемақы төленеді. Жәрдемақы бала санына қарай беріледі, әр балаға шамамен 10 мың теңге. 4 балаға – 42 496 теңге; 5 балаға – 53 127 теңге; 6 балаға – 63 757 теңге; 7 және одан көп балаға – 74 388 теңге.

Осыдан кейін 8-10 бала тәрбиелеп отырған аналар тарапынан «Үкімет неге 7 баламен шектелді?» деген уәж айтылды.

«Өткен айда бұл мәселені қарадық, депутаттармен талқыладық. Қазір депуттардың тарапынан сол қабылданған заңға өзгерістер ұсынылып отыр. Біз осы бастаманы толықтай қолдадық. Тиісті өзгерістер Үкіметтен шығып, Парламент қарауына жіберіледі.

Осы орайда жобалап айтайын, егер 7 балаға 74 мың теңге болса, енді 8 балаға – 85 мың теңге, 9 балаға – 96 мың теңге, 15 балаға 160 мың теңгедей белгіленеді. Оған тиісті қаражатты қарастырдық», - деді Нұрымбетов Мәжіліс кулуарында.

Министрдің айтуынша, Солтүстік Қазақстан облысында кәмелетке толмаған 15 баласы бар бір отбасы тұрады екен. «Отбасында 15 бала болса, әрине, 74 мың теңге аз», - деді ол.

Бұған дейін министр 1-3 баласы бар отбасыларға жәрдемақы төлеу мәселесі әзірге шешімін таппағанын айтқан еді.