$ 448.15  483.46  4.86

«Халықтың көпшілігі тақыр кедей»: депутат Асқар Маминнен жұмысшылардың жалақысын көтеруді сұрады

«Үкімет айтып жүрген орташа айлық жалақы мөлшері жәй ғана математикалық есеп және елдегі шынайы жағдаймен сәйкесе бермейді. Бай мен кедейдің арасы күн санап алыстап барады», - деді депутат.
фото: sputniknews.kz
фото: sputniknews.kz

Мәжіліс отырысында депутат Айқын Қоңыров еліміздегі бай мен кедейдің арасы жер мен көктей деп дабыл қақты. Оның пікірінше, қазіргі айлық төлеу жүйесін толықтай қайта қарау керек, деп хабарлайды Skifnews.kz ақпарат порталы, Dalanews.kz-ке сілтеме жасап.

«Халықтың шынайы табысы ресми мәліметпен сәйкесе бермейді, оған қарағанда әлдеқайда төмен. Халықтың көпшілігі тақыр кедей, жоқшылықтан көз ашпай өмір сүруде. Тіпті, тұрақты жұмысы болса да тапқан табысы ішіп-жеміне жетпейді», – деді Үкімет басшысы Асқар Маминге депутаттық сауал жолдаған Айқын Қоңыров.

Еске сала кетсек, бұдан бұрын Мамин Үкіметтің елдегі ең төменгі жалақыны орташа айлықтың деңгейіне жеткізуді көздеп отырғанын әрі ең төменгі күнкөріс деңгейі артатын айтқан болатын.

«Бұл аздық етеді. Үкімет қабылдаған іс-шара халықтың жағдайын жақсартуға жеткіліксіз. Қазір халыққа нақты нәтиже керек, тұрмысының түзелгенін нақты сезінуі тиіс. Реформа жасады екен, ол сөз жүзінде емес, іс жүзінде орындалуы қажет», – дейді депутат Қоңыров.

Халық қалаулысы осы орайда жалақы төлеу жүйесін толықтай қайта қарайтын кез келді есептейді.

«Үкімет айтып жүрген орташа айлық жалақы мөлшері жәй ғана математикалық есеп және елдегі шынайы жағдаймен сәйкесе бермейді. Бай мен кедейдің арасы күн санап алыстап барады. Табысы төмен, түтіні түзу ұшпайтын тұрғындар мен сыйлы лауазымда, жайлы креслода отырған, жоғары жалақы алатындардың арасындағы айырмашылық – жер мен көктей. Қала мен ауыл тұрғындарының табысы да екітүрлі.

Жалақыны жұмысшының білім-білігіне қарай қоятын жүйе біздің елде жоқ, қолынан іс келетін маман тамыр-танысы болмаса бағаланбайды. Карьералық өсу мүмкіндігі мүлде басқа факторлармен байланысты болып тұр», – дейді ашынған депутат.

Тағы оқи отырыңыз: «Сендердің бұл әрекеттерің – жабайылық»: қазақстандық армян Қордайдағы қақтығыс туралы айтты (ВИДЕО)

Оның ойынша, жалақы деңгейін есептейтін жаңа жүйе керек. Тұрмыс деңгейін бағалайтын қазіргі жүйе әлеуметтік-экономикалық саясатты әділетті жүргізуге кедергі келтіреді.

Сіздің реакцияңыз?
Ұнайды 0
Ұнамайды 0
Күлкілі 0
Ашулы 0

Серіктес жаңалықтары