«Арамтамақ, жатыпішер» деп шулаудың қажеті жоқ»: саясаттанушы ресми жұмыссыздардың мемлекет көмегінен қағылуы мүмкін екендігін айтты

Белгілі саясаттанушы Ерлан Саиров көпшілікті төтенше жағдай кезінде әлеуметтік жағынан қорғалмаған қаракөздерді "арамтамақ, жатыпішер" деп қаралаумауға, қайта оларға көмектесуге шақырды. "Аштық жөнінде белгі қазірдің өзінде келіп жатыр" деген оның пайымдауынша, "ресми жұмыссыз 450 адам мемлекеттің көмегінен тыс қалуы мүмкін" екен, деп хабарлайды Skifnews.kz ақпарат порталы.

Халықтың азаматы осындай қиын-қыстау кезеңде ел болып, ауызбіршілік таныту керек екендігін де атап өтті. Мәселен, Ерлан Саиров қазіргі таңда қарапайым бизнес өкілдерінің көмекке мұқтаж адамдарға білек сыбана қол ұшын созып жатқанын тілге тиек етті.

"Бұндай індеттің нақты аурудан басқа, жанама салдары болады. Ал ол салдары, аурудың өзінен де ауыр болуы ықтимал.
Дүниеде оба, тырысқақ, сүзек, "испанка" ауруларынан кейін, іле- шала аштық басталған. Осы әлеуметтік індеттің алдын алу жұмыстарын бастау керек. Бізде, өкінішке орай, ең төмен әлеуметтік қорғалған, өзіміздің, қаракөздер. Кредитке толы, қалада пәтерді жалдап тұрады, базарда тәшке тасиды немесе жалданып жұмыс істейді. Олардың қиын өмір жағдайға түскеніне бүгінгі зобалаң кінәлі. Тағы да, әдеттегідей, "ойбай, бұлар арамтамақ, жатыпішер" деп шулаудың қажеті жоқ. Дәл сол азаматтардың қатарында өзіміздің қарындастар мен бауырлар бар. Өзіміздің бауыр етіміз. Белді буып, көмектесу керек!

Өзін-өзі жұмыспен қамтитын 2,1 млн адам, ресми жұмыссыз 450 мың адам бар. Міне, осылар мемлекеттің ресми көмектерінен сырт қалуы мүмкін. Өйткені, басым көпшілігі ресми ешқайда тіркелмеген. Олар бар, бірақ, олар жоқ. Осы кісілердің жағдайына сақ болу керек. Қазірден, барлық облыс орталықтарында бірінші қажетті азық-түліктердің қорын жасап, адамдарға таратудың тетігін дайындап қою маңызды", - деп жазды саясаттанушы Facebook парақшасында.

Оған қоса, Ерлан Саиров қазіргідей ахуал кезінде "билік партиясы халыққа көмектесудің үлгісін көрсетті" деп отыр.

"Аштық жөнінде белгі, қазірдің өзінде, келіп жатыр. "Әрбір қазақ жалғызым" деген қанатты сөз бар. Осы сөзді іс жүзінде дәлелдеуге дайын болуымыз керек. Билік партиясы 10 күнде халыққа көмектесудің үлгісін көрсетті. Қазақстан бойынша 5 мың адамға азық-түлікпен көмек жасады. Қарапайым бизнес өкілдері де, азаматтар да өз кезегінде аянып қалып жатқан жоқ. Бәрі, қазірдің өзінде, білек сыбанып, жүгіруде. Дұрыс өнеге. Бұл үрдіске ірі бизнес өкілдері де қосылуға дайын болулары керек. Көптеген облыс, аудан әкімшіліктері көмек сұрап келген адамдарды бюрократияға салып, "анда бар, мында бар" деп коридорларға қуып жүр. Ертең, халықтың кәрі атады. Нақты көмек жасау керек. Жұт ескертіп келмейді, "сақтансаң сақтаймын" дейді."Бетін ары әкетсін" деп телейік. Дегенмен, сақадай сақ болайық!", - деп дүйім жұртты жақсылыққа үндеді.