Карантиндегі ішіп-жем: елорданың сақтандыру қорында тек ұн мен қант қана қалған

Бас қаланың сақтандыру қорында тек ұн мен қант қалды. Қалған әлеуметтік маңызы бар тауардың барлығы сатылып кеткен, деп хабарлайды Atameken Business.

Арнаға сұхбат берген «Астана» корпорациясы әлеуметтік-кәсіпкерлік департаментінің басшысы Ризагүл Муслимова, жыл басынан бері қоймаларда 7 мың тонна азық-түліктің болғанын айтады. Ал қазір болса, 4 мың тонна ұн мен 1200 тонна қант бар. Маман қалған өнім жыл соңына дейін жетеді деп сендірді.

Бұдан бөлек, корпорация кәсіпкерлерге жеңілдетілген несие беру арқылы әлеуметтік маңызы бар азық-түлік бағасын реттеуде. Несиелеу жергілікті бюджеттен 0,01%-бен беріліп жатыр. Қаладағы екі ірі кәсіпорын қарыз алып үлгеріпті. Олар: «Мир круп» – 245 миллион теңге көлемінде және «Айқын сапа» – 208 миллион теңге.