«Полицияның дәрменсіздігі»: Павлодар тұрғыны өз әйелін көшенің ортасында пышақтап тастады

Павлодарда 30 жастағы келіншекті күйеуі тапа-тал түсте көшеде өлтірмек болды. Ол әйеліне 5 рет пышақ сұғып, қансыратып қашып кеткен, деп хабарлайды Астана арнасы.

Жәбірленуші аман. Қазір ауруханада жатыр. Келіншектің айтуынша, жолдасы бұған дейін де оны өлтірем деп қорқытқан. Бірақ полицейлер оны жазалаған жоқ дейді.

30 жастағы Айдана Әбдірахманованың 3 баласы бар. Үйленгендеріне 2 жылдан енді ғана асыпты. Бірақ бір айдан бері бірге тұрмаған. Балаларын асырау үшін ол 6 айлық сәбиін тастап жұмысқа шыққан. Сол күні оны күйеуі аңдып, пышақтап өлтірмек болыпты.

“Күйеуім жұмыс істемейтін. Бірде бар, бірде жоқ. Ал қарыз бен несие көп. Оның үстіне балаларымды асырау керек. Амалсыз жұмысқа шықтым. Жұмысқа шыққанымды қызғанып, ішімдік ішетін. Содан кейін келіп айғай-шу шығарады. Амалсыздан полицияға арыз жаздым”, – дейді Павлодар қаласының тұрғыны Айдана Әбдірахман.

Әйелдің шағымынан кейін сот оған жақындамау туралы шешім шығарған. Алайда бұны да елемеген күйеуі әйелін қорқытып үркітуге көшкен.

“Қараша айының 7-сі күні ажырасу туралы өтініш жаздым. Ал тура 10 күннен кейін күйеуім мені аңдып тұрып пышақтады. Ол кезде жұмыстан шығып, телефонмен сөйлесіп келе жатқанмын. Бірден полицияға хабарласып, жедел-жәрдем шақырттым. Бетімді, қолымды, иығымды, жекемді бәрін тілгілеп тастады”, – дейді келіншек.

Зардап шегуші көп қан жоғалатқан. Қазір ауруханада жатыр.

“Науқастың қазіргі жағдайы қалыпты. Өміріне төніп тұрған қауіп жоқ. Өздігінен жүріп тұра алады. Тек жарақаттың ауырсынуы бар”, – дейді қалалық №1 аурухананың бөлім меңгерушісі Ерлан Жағыпаров.

3 баланың анасы полицияның дәрменсіздігіне шағымданады. Айтуынша, тәртіп сақшылары оған тек әкімшілік ғана іс қозғаған.

“Н. Назарбаев даңғылында орын алған факті бойынша қазір ҚР Қылмыстық кодексінің 106 бабымен сотқа дейінгі тергеу басталды”, – деп мәлімдеді қалалық полиция бөлімінің басшысы Әсет Асқаров.

Күйеуінен зәбір көрген әйел оның қатаң жазалануын сұрап отыр. Құзырлы органдардан көмек сұрайды.