Енді оқушылар «Болашақ» бағдарламасы арқылы шетелде оқи алады

Мәжіліс депутаттары жұмыс тобының отырысында халықаралық олимпиадалар мен ғылыми жобалар жеңімпаздарын қолдау туралы норманы қабылдады, деп хабарлайды Skifnews.kz ақпарат порталы.

Депутат Асхат Аймағамбетов өзінің әлеуметтік желісінде өте маңызды түзету жайлы жазды. Депутат атағандай, енді халықаралық олимпиадалар мен ғылыми жобалар байқауларының жеңімпаздары «Болашақ» бағдарламасы аясындағы тиісті талаптарға сәйкес келсе, бакалавриат деңгейінде білім ала алады.

«Бұған дейін «Болашақ» тек магистратура және докторантура деңгейіндегі оқуды қаржыландыратын. Бұл өз алдына дұрыс шешім болғанымен, халықаралық олимпиадалар жеңімпаздарына қатысты мәселе туындайтын еді. Әлемдік жетекші университеттер бұл талантты балаларға бірден бакалавриатқа гранттар ұсынатын, сол себепті олар шетелге кетіп қалатын. Сол кезеңде біз оларға дәл осындай қолдау көрсете алмадық, сондықтан оларды жиі жоғалтып отырдық. Көпшілігі шетелде оқумен қатар, сол жақта тұрақтап қалып жатты», - деді ол.

Осындай балаларға мемлекеттік бюджет есебінен грант беру – маңызды қадам. Сәйкесінше, енді «Болашақ» бағдарламасы ең дарынды оқушылар үшін бакалавриаттан бастап қолжетімді болады.

«Бұл – жас таланттарды қолдап, оларды елде ұстауға мүмкіндік беретін маңызды жаңашылдық. Олар әлемнің үздік жоғары оқу орындарында білім алып, кейін елге оралып, Қазақстанның дамуына өз үлестерін қосады. Дарынды балаларды қолдау – олардың болашағына салынған инвестиция ғана емес, бұл Қазақстанның дамуына бағытталған стратегиялық қадам», - деп айтты Асхат Аймағамбетов.