Білім & Ғылым 04.03.2020 сағат 04:20

Бір пәнді тапсырудың өзі – 14 мың теңге: елімізде 7 ЖОО жемқорлыққа белшеден батып отыр

Диплом жұмысын өте жақсы деңгейде қорғап шығу үшін 105 мың теңге төлеу жеткілікті. Ал ақылы бөлімнен грантпен оқу бөліміне ауысу үшін 400 мың теңге беруге тиіссіз.
Бір пәнді тапсырудың өзі – 14 мың теңге: елімізде 7 ЖОО жемқорлыққа белшеден батып отыр
фото: zakon.kz
Бөлісу
Бөлісу
Бөлісу

«Jas Otan» Қазақстандағы жемқорлықпен аты шыққан 7 бірдей жеке меншік жоғары оқу орнының тізімін жариялады, деп хабарлайды ҚазАқпарат.

Отандық жоғары оқу орындарының жемқорлыққа бейім екеніне әрбір сегізінші студенттің көзі жетіп отыр. «Nur Otan» партиясы «Jas Otan» жастар қанатының төрағасы Елнұр Бейсенбаев «Таза сессия» акциясының екінші кезеңінің қорытындысын айтты. Анонимді сауалнамаға еліміздегі 64 жеке меншік жоғары оқу орнында оқып жатқан 20 мыңнан астам студент қатысқан.

«Көптеген студент пара беруді ЖОО-ны оқымай-ақ бітірудің жолы сияқты көреді. Десек те, оқытушылардың өздері осындай жағдайда оқу бітірген, түлектерінің алдағы тағдыры оларды алаңдатып отырған жоқ. «Jas Otan» жастар қанатының белсенділеріне студенттер көптеп хабарласып, көмек сұрайды.

Сауалнама негізінде студенттердің жемқорлық фактілерін көрсеткен 7 жоғары оқу орнының рейтингі жасалды. Бұлар – Нұр-Сұлтан қаласындағы Медициналық университет, Жетісай қаласындағы «Сырдария» университеті, Алматыдағы Қазақ туризм және спорт академиясы, Шымкент қаласындағы Аймақтық әлеуметтік-инновациялық университет, Алматыдағы Орталық Азия университеті, «Алматы» университеті, С. Баишев атындағы Ақтөбе университеті», - деді Елнұр Бейсенбаев.

Респонденттердің пікірінше, жемқорлық фактісі ең көп емтихан және есеп тапсыру кезінде (23,8%), дипломдық жұмыс қорғау кезінде (8,7%) көрініс беріп отыр. Ал «ЖОО студенттері параны кімге көп береді?» деген сұрақ бойынша студенттердің 30%-ы конвертті оқытушыларға беретіні, ал 4,4%-ы ректорларды тікелей сатып алатыны анықталды.

Ұсынылатын параның мөлшері де ерекше назар аударуды қажет етеді. Жасотандықтардың дерегіне сүйенсек, Қазақстан бойынша сессияны жабу бағасы – 22 мың теңге, бір пәнді тапсыру – 14 мың теңге болса, курстық жұмыс 32 мың теңге тұрады екен.

«Диплом жұмысын өте жақсы деңгейде қорғап шығу үшін 105 мың теңге төлеу жеткілікті. Ал ақылы бөлімнен грантпен оқу бөліміне ауысу үшін 400 мың теңге беруге тиіссіз. Бұл – адамның ақылына сыймайтын дүние», – дейді «Jas Otan» жастар қанатының төрағасы.

Сауалнама талданып біткен соң барлық ақпарат «Jas Otan» тарапынан Білім және ғылым министрлігіне жолданатын ұсыныс хатта көрсетілетінін атап өтуге болады.

Еске сала кетсек, «Nur Otan» партиясы саяси кеңесінің кеңейтілген отырысында елбасы, партия төрағасы Нұрсұлтан Назарбаев ЖОО-дағы жемқорлықты жоюды тапсырған болатын.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар