Қазақстан мен Еуропа қарым-қатынасының келешегі талқыланды

Мемлекет басшысы Нұрсұлтан Назарбаев Еуропалық комиссияның төрағасы Ж.М.Баррозумен телефон арқылы сөйлесті, деп хабарлайды Skifnews.kz.

Ақорданың баспасөз қызметі мәлімдегендей, әңгіме барысында Қазақстан мен Еуропа қарым-қатынасының қазіргі ахуалы мен келешегі талқыланды.

Сонымен қатар Украинадағы ахуалдың өрбуіне арнайы назар аударылды.

«Еурокомиссия Төрағасы Ж.М.Баррозу биылғы 26 тамызда Минскіде Кеден одағы елдері, Украина және Еуропалық одақ кездесуін өткізу туралы Қазақстанның ұсынысын қолдады. Қажет болған жағдайда сондай кездесуді Астанада өткізу туралы уағдаластық жасалды», делінген хабарламада.

Сондай-ақ Н.Ә.Назарбаев пен Ж.М.Баррозу кезекті форумы биыл қазан айында Миланда өтетін «Азия-Еуропа» (АСЕМ) үдерісіне Қазақстанның қатысуының перспективасын талқылады.

Телефон арқылы сөйлесу еуропалық тараптың бастамасымен жүзеге асты.