Бұған дейін Бақыт Нұрмұханов Конституциялық Соттың судьясы қызметін атқарған.
Мемлекет басшысының Жарлығымен Бақыт Маратұлы Нұрмұханов Қазақстан Республикасы Конституциялық Соты төрағасының орынбасары қызметіне тағайындалды, деп хабарлайды Sn.kz ақпарат порталы.
Бұған дейін Бақыт Нұрмұханов Конституциялық Соттың судьясы қызметін атқарған. Ол сот жұмысына белсенді қатысып, конституциялық құқық пен конституциялық әділет мәселелеріне арналған халықаралық іс-шараларда Қазақстанның атынан өкілдік еткен.
Мәселен, 2025 жылдың сәуір айында Нұрмұханов Түркияның Стамбұл қаласында өткен «XXI ғасырдағы конституциялық әділеттің болашағы» халықаралық симпозиумына қатысты. Жиынға 35 елдің конституциялық бақылау органдарының басшылары мен судьялары, сондай-ақ халықаралық ұйым өкілдері жиналған.
Іс-шара барысында Бақыт Нұрмұханов Қазақстандағы конституциялық реформаның нәтижелері, қайта құрылған Конституциялық Соттың жұмыс ерекшеліктері және азаматтардың өтініштерін қарау тәртібі туралы баяндама жасаған.
Қазақстан Конституциясына сәйкес, Конституциялық Сот – ел аумағында Конституцияның үстемдігін қамтамасыз ететін тәуелсіз мемлекеттік орган. Оның құрамына төраға мен он судья кіреді. Судьялардың өкілеттік мерзімі – сегіз жыл.
Ал Конституциялық Сот төрағасының орынбасарын Президент сот төрағасының ұсынысы негізінде судьялар арасынан тағайындайды.
Осылайша, Бақыт Нұрмұханов Конституциялық Сот төрағасының орынбасары қызметіне кірісті.