АҚШ президенті Дональд Трамп ҚХР басшыларының ел конституциясына енгізіп жатқан өзгерістеріне қатысты пікір айтып, төраға Си Цзиньпинді ашық кекетті. Мемлекет басшысының бұл мәлімдемесін CNN телеарнасы көрсеткен.
"Енді ол (ҚХР төрағасы Си Цзиньпин) өмірінің соңына дейін елді басқарады. Мәңгілік төраға. Жоқ, ол керемет... Қараңыздар, оның қолынан келді, ол өзгерістерді енгізе алды. Мен мұны керемет бастама деп есептеймін. Мүмкін біз де алдағы уақытта солай жасаймыз?!" - деді Дональд Трамп Флоридада өткен жиындардың бірінде.
Естеріңізге салайық, өткен аптада Қытай Коммунистік партиясы конституцияға енгізіліп жатқан өзгерістер жобасын халыққа таныстырған болатын. Онда ел төрағасының құзыретін кеңейту, билігінің мерзіміне қойылатын шектеуді алып тастау мәселелері қаралған. Қазіргі заң бойынша ҚХР төрағасы әр бес жылда екі рет сайлана алады.