Саясат 14.08.2019 сағат 11:25

«300 мың доллар!»: шымкенттік журналист экс-әкім Ғабидолла Әбдірахимовты айыптады

«2017 жылы Жуминнің ЖШС Шымкент қаласының әкімдігінен 97 миллион теңгеге мемлекеттік тапсырыс алды. Бұл - шамамен 300 мың доллар!».
«300 мың доллар!»: шымкенттік журналист экс-әкім Ғабидолла Әбдірахимовты айыптады
Бөлісу
Бөлісу
Бөлісу

Шымкенттік журналист Зәуре Мирзаходжаева бұрынғы қала әкімі Ғабидолла Әбдірахимов пен оның орынбасары Данат Жумин екеуінің ымдаса-жымдаса атқарған бір тірліктерін әлеуметтік желіге жариялап жіберді. Оған экс-әкім жауап қатып үлгерді, деп хабарлайды Zakon.kz, Bnews.kz-ге сілтеме жасап.

Жергілікті журналист экс-әкімді қала бюджетінен жарнамаға дегенді желеу етіп, орынбасарының "АПЕКС-Консалтқа" ЖШС-не миллиондар аударған деп айыптады.

- Қараңыздаршы, тек 2017 жылы Жуминнің ЖШС Шымкент қаласының әкімдігінен 97 миллион теңгеге мемлекеттік тапсырыс алды. Бұл - шамамен 300 мың доллар! Онда да бұл тек Шымкент әкімдігі Ішкі саясат басқармасының бағыты бойынша ғана. 2018 жылы бұл сома аздау болып қалыпты, бар болғаны - 56 мың доллар. Бірақ 2016 жыл - ЖШС үшін майшелпекке кеңелген кезең. Ол туралы басқа жолы сөз қозғармыз, әзірге 2017 жылдың тендерінің жайын талқылап алайық. Бір қызығы, 2017 жылы тендерге қойылған 10 лоттың 7-еуі "Жумин" компаниясына ешқандай бәсекелессіз негізде берілген, - деп жазды Зәуре Мирзаходжаева.

Журналистті мемлекет ақшасының «зың» секілді халықтың миын ашытып, көзін байлайтын жеңіл-желпі дүниелерге жұмсалғаны қынжылтқан.

Осыған қатысты Ғабидолла Әбдірахимовтың өзі Bnews.kz-ке қысқаша сұхбат берген.

- Иә, мен әкім болдым. Әкімдік жанында бөлімдер бар, конкурстық комиссия деген бар, солар конкурсты өткізетін. Енді ойлаңызшы, мен сол конкурстардың барлығын бақылап отыруым керек пе сонда? Егер алды ма, демек, алды. Егер қандай да бір проблемалар болса, онда құқық қорғау органдарына шағымдансын, солар айналыссын бұл іспен. Ол жағына менің наразылығым жоқ. Егер біреу заң бұзған болса, онда кез келген құқық бұзушылыққа белгілі бір жаза қарастырылған. Мыңдаған бәйге, конкурс өткізіліп жатады, соның бәрін мен қадағалап отыра алмаймын ғой, - деді экс-әкім.

Сондай-ақ, ол өзінің бұрынғы орынбасары Данат Жуминді ұзақ уақыт көрмесе де, өздерінің қарым-қатынастары бұрынғыдай дұрыс екенін айтты.

Оқи отырыңыз

загрузка...

Соңғы жаңалықтар

Қызықты материалдар