Саясат 19.02.2020 сағат 06:55

«Менің абыройымды ешқандай блогер түсіре алмайды»: Амандық Баталов өзін сынағандарға өкпелі

«Өзімнің қандай екенімді, қалай жұмыс істейтінімді білемін. Түсіндіңдер ме? Осыны басқаларға да айтып бар! Менен үлкен сәлем деңдер», - деді облыс әкімі.
«Менің абыройымды ешқандай блогер түсіре алмайды»: Амандық Баталов өзін сынағандарға өкпелі
фото: bugin.kz
Бөлісу
Бөлісу
Бөлісу

Халықтан түсетін арыз-шағым көрсеткіші бойынша Алматы облысы республикада үшінші орында тұрған көрінеді. Бұл туралы Алматы облысының әкімі Амандық Баталовтың азаматтарды жеке мәселелері бойынша қабылдауына Alem Social жүйесін таныстыра келген Ерлан Мейрамбаев жеткізді, деп жазады «Жетісу» газеті.

Аталмыш жүйе барлық танымал әлеуметтік желідегі шағым, жағымсыз жазбалар және мемлекеттік мекемелерге жазылған өтініштерге мониторинг жүргізеді. Әсіресе, білім, денсаулық, қауіпсіздік, тұрғын үй-коммуналдық шаруашылығы және тағы басқа салалар қамтылған. Аймақ бойынша бір айдың ішінде 1500-ден астам шағым түсіпті.

Ерлан Мейрамбаев осы жүйемен келісімшарт жасасып, бірге жұмыс істеуді ұсынды. Аталмыш жүйенің айлық құны 2 миллион теңгені құрайтын көрінеді. Бұл туралы облыстық ішкі саясат басқармасының басшысы Рустам Алпысбаев: «Амандық Ғаббасұлы, республика бойынша шынайы ақпарат беретін осындай ұйымдармен жұмыс істеп жатырмыз. Осы ұйымға былтыр жүйені дамыту туралы ұсынысымызды айтқан болатынбыз. Бір жағынан ақысы қымбаттау», - деді.

Ал Амандық Баталов: «Мәселе онда емес. Нақты жағдай көрініс тапса, 10 миллион теңге болса да қабылдар едім. Олар біздің не істеп жатқанымызды біле ме? Жақсы, мыңдаған адамды жинайық, мен де шығайын. Жағымсыз жазба жариялаған блогерлер де келсін. Халықтың бағасы қандай екенін өз көздерімен көрсін.

Барлық ауданға өзім барамын. Халықпен кездесемін. Қай жерде қандай мәселе бар екенін жақсы білемін. Керек десеңіз, жасалған жұмысты сапалық та, сандық тұрғыда да дәлелдеп беремін. Сіздердікі – жалған ақпарат. Бұл дұрыс емес», - деп, содан кейін кейбір блогерлердің жазбаларына сын айтты.

«Бір блогер мен туралы «камерадан қорқады» деп жазыпты. Бір мерекенің өзінде 11 баланың тұсауын кестім. Неге екенін білесіз бе? Қазақ – ырымшыл халық. «Сізге ұқсасын» деп айтады. Ана блогер жазғандай мен камерадан қорықпаймын. Осыған дейін абырой жинадым. Менің кім екенімді бәрі біледі. Құрылысшы, спортшы екенім барлығына аян. Менің абыройымды ешқандай блогер түсіре алмайды. Өзімнің қандай екенімді, қалай жұмыс істейтінімді білемін. Түсіндіңдер ме? Осыны басқаларға да айтып бар! Менен үлкен сәлем деңдер», - деді облыс әкімі.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар