«25 адам митингке шықса, 250 ішкі істер органының адамы бірге жүреді» - Мәжіліс депутаты

Митинг кезіндегі ішкі істер органдары қызметкерлерінің этикасына қатысты норма керек. Мұндай ұсынысты митингті талқылау кезінде Мәжіліс депутаты Берік Дүйсембинов айтты, деп хабарлайды Skifnews.kz ақпарат порталы, baq.kz-ке сілтеме жасап.

«Бейбіт шеруге, бейбіт митингке қатысатындардың статусын жіліктеп жазыпсыңдар. Оның арасында журналистердің де қызметі көрсетілген. Енді осы ретте шындыққа қарайықшы, бұған дейін митингтерді қарасақ, 25 адам митингке шықса, 250 ішкі істер органының адамы бірге жүреді.

Жаңа алаң қоршалған, соғыс болған сияқты. Ол жерден өту қорқынышты. Адамдар митингке қатысушылардан емес, қоршап тұрған әскерден қорқады. Баламыз мектебіне айналып басқа жолмен барады», - деді Берік Дүйсембинов.

Оның айтуынша, заңға митингте жүретін ішкі істер органдары қызметкерлерінің арнайы этикасын енгізу керек.

«Енді митингке қатысатын негізі ішкі істер органы. Еліміздің тыныштығы керек, оған сөзсіз келісемін. Олардың да жазығы жоқ. Бірақ, меніңше, арнайы жасақ дейміз бе, митингте жүретін ішкі істер органдары қызметкерлерінің арнайы этикасын заңға енгізу керек.

Әйтпесе, өзіміз балаларды жауыз қылып бітірдік. Қазіргі күні ешқандай министрдің баласы милиция болып, көшеде адам сүйреп жүрген жоқ. Олардың бәрі – қарапайым отбасының балалары. Қазір бейнекамералар бар, сол арқылы қарап отыру керек пе, сондай бір әрекет жасау қажет. Топырлатып жасақ жіберіп, адамдарды сүйретуді тоқтату керек», - деді депутат.