Саясат 18.05.2020 сағат 23:50

«Мұны кәсіби қызметіммен байланыстырамын»: Алматыда Айман Омарованың көлігі өртенді

«Тежегішті басқанымда, тежегіш ұстамай қалды. Айғайлай бастадым. Бұрылып, шығайын ба, секірейін бе деп ойлап тұрғанымда көлік әйтеуір тоқтады. Әрең тоқтатқан кезде өртене бастады».
«Мұны кәсіби қызметіммен байланыстырамын»: Алматыда Айман Омарованың көлігі өртенді
Бөлісу
Бөлісу
Бөлісу

18 мамыр кешкісін Алматыда Әл-Фараби даңғылында адвокат Айман Омарованың көлігі өртенді. Омарова оқиға орнынан Facebook желісіне тікелей эфирге шықты. Сөзінше, көлігінің тежегіші істен шығып, кейін өртене бастаған. Омарова көліктен шығып үлгергенін айтты. Қорғаушы бұл жағдайды кәсіби қызметімен байланыстырады, деп хабарлайды Азаттық радиосы.

«Мұны кәсіби қызметіммен байланыстырамын. Ақырын келе жатып, тежегішті басқанымда, тежегіш ұстамай қалды. Айғайлай бастадым. Бұрылып, шығайын ба, секірейін бе деп ойлап тұрғанымда көлік әйтеуір тоқтады. Әрең тоқтатқан кезде өртене бастады. Өртті өшірді. Бірақ, көліктің жартысы жанып кетті. Кейбір құжатты алып шықты. Кейбірі жанып кетті. Стресс жағдайында тұрмын», - деді ол Азаттыққа.

Алматы қаласының Полиция департаменті оқиғаға қатысты әзірге комментарий жариялаған жоқ.

2019 жылы 5 маусымда адвокат үйінде белгісіз біреулер итін өлтіріп кеткенін айтқан. Ол бұл оқиғаны да кәсіби қызметімен байланыстырған.

Айман Омарова Қазақстандағы қоғам назарын аударған бірнеше сотта адвокат болған. Ол Шыңжаңдағы қысымнан қашып, қазақ-қытай шекарасын кесіп өткен қазақтардың, соның ішінде Сайрагүл Сауытбайдың ісінде, Қытай мәселесін көтерген белсенді Серікжан Біләш «араздықты қоздырды» деп айыпталғанда, зорлық-зомбылық көрген әйелдердің ісінде қорғаушы болған. Бұдан бөлек, ол – Азаттық тілшілерінің жұмысына кедергі келтіру ісі бойынша да адвокат.

Омарова – Қазақстан президенді Қасым-Жомарт Тоқаев құрған билік пен халық арасында диалог орнатуды көздейтін Ұлттық сенім кеңесінің мүшесі. Ол Ұлттық кеңес отырыстарының бірінде Тоқаевтан даулы «Жала жабу» және «Араздықты қоздыру» бабын Қылмыстық кодекстен Әкімшілік кодекске ауыстыруды сұраған. Құқық қорғаушылар бұл заң билік өкілдерін сынайтындардың аузын жабу құралы деп санайды.

Омарова 2018 жылы АҚШ үкіметінің International Women of Courage Award, яғни Халықаралық батыл әйелдер сыйлығын иеленді. Бұл сыйлық 2007 жылдан бері кәсібін атқара жүріп, қайраткер ретінде танылған әйелдерге беріледі.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар