Саясат 28.09.2020 сағат 03:15

«Елімізде 4 мыңға жуық дәрігер жетіспейді» - Мұрат Бақтиярұлы

Медицина университетінің басшылығы депутаттарға өткен оқу жылының қорытындысы бойынша түлектердің 90%-ы денсаулық сақтау мекемелеріне жұмысқа орналасқанын хабарлады. Алайда, бұл жеткіліксіз деп есептейді сенаторлар.
«Елімізде 4 мыңға жуық дәрігер жетіспейді» - Мұрат Бақтиярұлы
Бөлісу
Бөлісу
Бөлісу

Сенаттың Әлеуметтік-мәдени даму және ғылым комитетінің сенаторлар тобы Шығыс Қазақстан облысында жұмыс бабындағы сапарда болды. Депутаттар Семейдегі жүздесулерде дәрігерлердің жетіспеушілігі мәселесін талқылады, деп хабарлайды BAQ.KZ.

Сенаторлар аймақтағы бірқатар маңызды мәселені – мектептердегі қашықтан білім беру форматының тиімділігі, медициналық кадрларды даярлау және биліктің коронавирустың екінші толқынына дайындығын зерделеуді жоспарлаған болатын.

Медицина университетінің басшылығы депутаттарға өткен оқу жылының қорытындысы бойынша түлектердің 90%-ы денсаулық сақтау мекемелеріне жұмысқа орналасқанын хабарлады. Алайда, бұл жеткіліксіз деп есептейді сенаторлар. Елде дәрігерлердің жетіспеушілігі байқалады. Әсіресе, қазір пандемияның екінші толқыны күтіліп отырған кезеңде инфекционист дәрігерлер мен вирусологтарды даярлау қажет. Бұл туралы депутат Мұрат Бақтиярұлы Семей қаласының медициналық жоғары оқу орындары оқытушыларымен кездесуі барысында айтты.

«Дәрігерлерді даярлау ісі де жаңа форматқа көшкенін көріп отырмыз. Семей мемлекеттік медицина университетінің базасымен танысқан кезде онда білікті дәрігерлердің, оқытушы-профессорлық құрамның бар екенін көрдік. Бірақ, ескере кететін бір мәселе бар. Жалпы, мамандыққа байланысты Денсаулық сақтау министрлігі бір бетбұрыс жасауы керек. Мысалы, біздің елімізде 4 мыңға жуық дәрігер, әсіресе, инфекционистер, вирусологтар жетіспейді. Осыған байланысты тиісті мамандықтар мен кафедраларды ашу қажеттілігі туындап отыр», - деді Мұрат Бақтиярұлы.

Сенат депутаттарын білім беру гранттарын жасақтау және іске жарату, жас мамандарды жұмыспен қамту және «Дипломмен – ауылға» мемлекеттік бағдарламасының нәтижелері қызықтырады. Сонымен қатар, Сенат депутаттары «Жұмыспен қамтудың жол картасы – 2020» және «Нұрлы жер» бағдарламаларының жүзеге асырылу барысын тексеріп, халықтың әлеуметтік осал топтарына арналып салынып жатқан үйлерді және мәдени-спорт кешенін аралап көрді. Сонымен қатар, депутаттар көп балалы отбасыларға арналған үйлер, жаңа мектеп салу процесімен, пандемия кезіндегі ауылдық елді мекендердің жай-күйімен және проблемаларымен танысты.

Депутаттар жедел медициналық жәрдем ауруханасында болып, гибридті операция бөлімінің жұмысымен танысып, медицина қызметкерлерінің жалақысын көтеру мәселесін талқылады. Сондай-ақ, педагогикалық колледжге барды. М.Әуезов атындағы педагогикалық колледжге «Ұлттық педагогикалық колледж» мәртебесін беру мәселесін көтерді.

Абайдың туған жеріне сапар аясында сенаторлар Ақшоқы, Қарауыл, Қасқабұлақ ауылдары мен Жидебайда болып, Құнанбай Өскенбайұлы музейімен, «Абай-Шәкәрім» мемориалдық кешенімен танысты. Ауылдың әлеуметтік нысандарын аралады, жаңа мектеп пен көпбалалы отбасыларға арнап салынып жатқан үйлерді, мектеп-интернат пен амбулаторияны көрді. Сапар қорытындысы бойынша, депутаттар өңірдің оң дамуын атап өтті.

«Жұмыс сапары аясында біз Семейде және Абайдың туған жері Жидебайда болдық. Ұлы Абайдың 175 жылдығын атап өтетін жылы біздің сапарымыздың мақсаты ел Президенті Жолдауының орындалуын бақылау болды. Жұмыспен қамтудың жол картасы аясындағы барлық жобалар жақсы орындалуда, өңір дамып келеді. Семейде Қарағайлы жаңа шағын ауданы салынып, даму қарқынды жүріп жатыр», - деді Сенат депутаты Мұрат Бақтиярұлы.

Сенаторлар Қарауылдағы Абай ескерткішіне гүл шоқтарын қойды.

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар