Саясат 27.05.2021 сағат 21:23

«Қос азаматтығы бар» деп айыпталған шымкенттік шенді ел күтпеген мәлімдеме жасады

Менде қос азаматтық болмаған және қазір де жоқ.
«Қос азаматтығы бар» деп айыпталған шымкенттік шенді ел күтпеген мәлімдеме жасады
Фото: ашық дереккөз
Бөлісу
Бөлісу
Бөлісу

Дене шынықтыру және спорт басқармасының экс-басшысы Олег Почивалов өмір бойында Шымкентте тұрып келгенін және ешқашан қос азаматтығы болмағанын мәлімдеді. Оның айтуынша, әлдекімдер "жайлы орнынан айырылып қалғаны үшін" қасақана оның жолын бөгеген, - деп хабарлайды Tengrinews.kz.

"Менде қос азаматтық болмаған және қазір де жоқ. Шымкентте дүниеге келдім, бүкіл өмірімді Шымкентте өткіздім, ата-анам Шымкенттен. Мұнда екі жоғары білім алғанмын. Осында тіркелгенмін, тіркеуден шықпағанмын, ешқашан көшпегенмін. Бес балам да - Қазақстан азаматы", - деді Олег Почивалов сұхбатында.

Экс-шенеунік бұл лауазымда белсенді жұмыс істегендіктен оның орнына әлдекімдерді әдейі қойғанына сенімді.

"Интернетте мәлімет таралды, Ресей Федерациясының ішкі құжаттарының көшірмесі. Қайдан алғаны түсініксіз. Ресей ІІМ сайты арқылы өзім арыз жаздым. Маған жауап келді, сол құжат бойынша мен РФ азаматы емеспін, балаларым да, әйелім де - ешкім.

Басты мақсаты - мені мемлекеттік қызметтен кетіру, Шымкенттің спорт басқармасы басшысы қызметінен кетіру. Себебі біз реформа өткізіп, әлемде көріп отырған үздік тәжірибені әкелмек ойымыз болды, мына нарық жағдайында, пандемия жағдайында. Жоспар құрдық. Бұқаралық спортты дамыту бойынша көп іс атқарылды. Бәріне бірдей ұнай қойған жоқ, себебі біз әлдекімдерді жайлы орнынан айырдық. Бастапқыда жұмыстағы бір мәселелерден басталды, тексерісте ол дәлелденбеді. Сосын азаматтығым бойынша осындай шабуыл жасалды", - дейді Олег Почивалов.

Сонымен бірге, ол сот әділетсіз өткенін айтты.

"Сот ісі жүріп жатқан кезде сот менің адвокаттарым ұсынған бірде-бір құжатты қабылдаған жоқ. Менің қолымда Ресей Федерациясының азаматтығы жоғы туралы анықтама болды. Оны ешкім қабылдаған жоқ. Шығарылған қорытындыда (қос азаматтық фактісі. - Еск.) "Қазақстан ҰҚК-нен алынған ақпарат бойынша" деп белгіленген. Ал біздің қолымызда ҰҚК Ресейге ешқандай сұраныс жібермегені туралы анықтама болды. Мұны да сот ескермеді. Істің тапсырыспен жасалғандай сипаты бар", - деді Почивалов.

Апелляция да нәтиже бермеді.

"Бұл бұрын-соңды болмаған сот отырысы. Біз шағымданған кезде, ол менің адвокатыма хабарламай-ақ, өтетінін айтпастан, сырттай қаралды. Бізге түскен бірде-бір құжатты қабылдамады", - дейді экс-шенеунік.
Осылайша Олег Почивалов мемлекеттік қызметінен ғана емес, Қазақстан азаматтығынан да айырылған. Ол басқа азаматтығы жоқ болғандықтан, ол азаматтығы жоқ адам болып қала беретінін айтты. Алайда, ол берілмеймін деп отыр.

"Мен Жоғарғы сотқа шағымданып, Бас прокуратураға наразылық білдірдім және Елбасы - Тұңғыш Президенттің атына заңсыздық болып жатқаны туралы хат жаздық. Полиция белсенді емес, сот жүйесі мүлдем түсініксіз. Мен паспортты тапсырмадым және куәлікті тапсырмадым. Бас прокуратураға наразылық білдірген кезде онда құжаттар қажет болды", - деп бөлісті Почивалов.

Желіде жарияланған құжаттардың фотосуреттерінде Почивалов Мәскеу облысында тіркелгені хабарланған.
"Мәскеу облысында мен ешқашан болған емеспін. Бұл факт бойынша қазір қылмыстық іс қозғалды. Шынында да құжат болды, бірақ қалай берілгені белгісіз. Ол қылмыстық іс негізінде жойылды, өйткені менің өтініштерім де, бастапқы құжаттарым да, төлқұжаттарым да болған жоқ. Оның үстіне, ол жерде ешқашан жылжымайтын мүлкім болған емес.

Егер мен кеткім келсе, 90-жылдары кетер едім. Маған не үшін керек сонда? Менің аталарым мен ата-анам осында тұрды. Мен неге кетуім керек? Жаман адамдар бар, бұл біздің ел жаман дегенді білдірмейді. Мұндай ойлар ешқашан болған емес. Менің бес ұлым бар, мен оларды тәрбиелеймін, сондықтан сіз туған жерде өмір сүруіңіз керек, өз еліңіз бен Отаныңыздың дамуына күш салуыңыз керек. Менің жұбайым - өзбек, бауырымның әйелі - қазақ", - дейді экс-шенеунік.

Ол қазақ тілін үйрену үшін репетитор жалдағанын және қазақ тілінде бірнеше рет баяндама жасағанын да қоса айтып отыр.

Почивалов мәселені мүмкіндігінше тезірек шешуге тырысуының тағы бір себебі бар.
"Менің Токиодағы Олимпиада ойындарына төрт лицензиям бар. Мен бұл команданы өзім басқарамын. Біздің жігіттер медаль алуы үшін Токиода болуымыз керек. Бірақ мен жыл басынан бері бірде-бір іс-шараға қатысқан жоқпын, тек онлайн.

Мен бүкіл өмірімді балалар спортын дамытуға арнадым. 600-ден астам адам - мен тәрбиелеген спорт шеберлері. Мен өзім 1991 жылдан бері жаттықтырушымын. Өзім атыс бойынша Азияның екі дүркін чемпионымын және елдің еңбек сіңірген бапкерімін", - деп толықтырды Олег Почивалов.
Еске салайық, Шымкенттік шенеуніктің қос азаматтығы туралы ақпарат желіде бірнеше ай бұрын пайда болды. Ол кезде Почиваловтың Қазақстан мен Ресейдің құжаттары бар екені хабарланған болатын.
Алдымен Шымкент әкімдігінде бұл ақпарат теріске шығарылды, бірақ кейін шенеунік қызметінен айырылды. Сот 2021 жылдың ақпан айында өтті. Сот үкімімен Почивалов Қазақстан азаматтығынан айырылды.
 

Оқи отырыңыз

загрузка...

Соңғы жаңалықтар

Аптасына бір рет ең танымал мақалалардың дайджесін жібереміз

Қызықты материалдар