«Анам мен балаларыма арнауға тиісті уақытымды ұрлады» – Бақытгүл Хаменова

31 қазанда Атырау облысы әкімінің экс-орынбасары Бақытгүл ХАМЕНОВАНЫҢ ісі бойынша өткен кезекті сот отырысында тараптардың жарыссөзі тыңдалды, деп хабарлайды Ақ Жайық. 

Мемлекеттік айыптаушы Лаура Асанова сотталушы Рысқалиевтың сотта берген екі түрлі айғағы бір біріне қайшы келгенін және Рысқалиевтің Антикор қызметкерлері «инструктаж өткізді» деген сөзіне дәлел болмағанын алға тартты. Бұдан басқа, Хаменоваға қатысты тергеу материалдары мен аудиожазбалардағы «манағыға өте сақ бол», т. б. сөздер параға қатысты екенін білдіретінін жеткізді.

Өз кезегінде Б. Хаменованың адвокаты Игорь ВРАНЧЕВ та, Рысқалиевтың адвокаты Нұрлан ЖОЛБОЛОВ та прокурордың айыбымен келіспейтінін мәлімдеді.

Бұдан кейін Хаменованың қорғаушысы әрі інісі Арман ХАМЕНОВ сөз алды:

"Бақытгүл 10 айдан бері Антикордың қиялынан туған жаланың зардабын тартып келеді. Біз әке-шешеміздің тәрбиесін көріп, әкеміздің «істегенді мойында, адал жолмен жүр» деген тәрбиесімен жүріп келеміз. Егер Бақытгүл пара алған адам болса, осылай ағайын-туыстары болып, оны қолдауға келер ме едік? Біреуге күлкілі болар, бірақ шынын айтқанда, Бақытгүлдің өз баспанасы да жоқ. Атырауда қызметтік пәтерде тұрды, Астанада парламент үйінде тұрды", - деді інісі.

Бұдан кейін Хаменова сотқа болған жайтқа қатысты 40 беттен тұратын өзінің уәжін жеткізді.

- Бұл бассыздық мен үшін және менің туыстарым үшін аса құнды абыройымды аяқ асты етті, жақындарымның денсаулығын нашарлатты. Ең сорақысы - науқас анама және балаларыма арнауға тиісті уақытымды ұрлады. “Хаменованың Адамовтан пара алу ниеті болды және параны Рысқалиев арқылы талап етті” деген айып жалаң сөз ғана, - деді ол.

А. Рысқалиев:

- Тергеу материалдарына сүйене отырып, сотталушылардың іс-әрекетіне дұрыс құқықтық баға береді деп сенемін. Мен де, Хаменова да Адамовтан пара сұраған емеспіз. Мен тек Адамовтан бастапқыда өзі ұсынған демеушілік қаржыны көмек ретінде сұрадым. Оны не үшін сұрағанымды өз жауабымда айтып өттім. Заңды және әділ шешім шығаруыңызды сұраймын, - деді.

Тараптардың жарыссөзінен кейін сот төрағасы Жұмағали ТАШИМОВ келесі отырысты 14 қарашаға қалдырды.

Еске салайық, бұған дейін айыптаушы тарап соттан Хаменова мен Рысқалиевты мүлкін тәркілеп, 7 жылға бас бостандығынан айыруды және өмір бойына мемлекеттік қызмет атқару құқығынан айыруды, ал пара берді деп айыпталған кәсіпкер У.Адамовты 4,5 жылға бас бостандығынан айыруды сұраған болатын. 

Материалды көшіріп басқанда және басқаша пайдалану кезінде azh.kz сайтына гиперсілтеме міндетті түрде қойылуы тиіс. Сондай-ақ ВК, Instagram пабликтерінде жариялауға тыйым салынады.