Президент «АрселорМиттал Теміртау» компаниясының жұмысын сынға алды

Мемлекет басшысы Қасым-Жомарт Тоқаев Үкіметтің кеңейтілген  отырысында «АрселорМиттал Теміртау» компаниясын арнайы тоқталып, жазатайым оқиғалардың жиілеп кеткенін сөз етті. Президенттің айтуынша, бүгінде өндірістік жарақаттар нағыз проблемаға айналып отыр. 

«Жыл басынан бері өндіріс орнында 1 124 жұмысшы жарақат алып, оның 157-сі қайтыс болды. Жекелеген кәсіпорындарда адам шығынымен болатын жазатайым оқиғалар жүйелі сипат алды. Бұл мәселе «АрселорМиттал Теміртау» компаниясына да қатысты. 2006 жылдан бері кәсіпорында 20-дан аса жазатайым оқиға болып, 100-ден аса азаматымыз қаза тапты. Биылдың өзінде 14 адам қайтыс болды. Оның ішінде 1 жұмысшы өткен аптада мерт болды. Мемлекеттік органдар мен қоғамдық ұйымдардың хабарламаларына сәйкес, компания еңбек, экология және салық заңдарын бұзып, инвестициялық міндеттемелерді орындамайды. Осыған байланысты халық әділ әрі шұғыл шаралар күтіп отыр, – деді президент.

Сондай-ақ Қасым-Жомарт Тоқаев премьер-министрге мәселені бақылауға алуды тапсырды.