10:0: Қазақ балуаны Арменияда өтіп жатқан әлем чемпионатында топ жарды

Қазақстандық еркін күрес шебері Мейіржан Әшіров әскерилер арасында әлем чемпионы атанды, деп хабарлайды Skifnews.kz ақпарат порталы. 

Армения астанасы Ереван күрес түрлерінен әскерилер арасындағы әлем біріншілігі басталып, балуандарымыз жарыстың алғашқы күнінде сәтті өнер көрсетті. Еркін күрестен 70 келі салмақта сынға түскен Мейіржан Әшіров қарсылас шақ келтірмей, алтыннан алқа тақты. Ол жартылай финалда ирандық балуанды 10:0 есебімен ұтса, финалда үндістандық спортшыны қапы қалдырды. Осылайша Мейіржан Қазақстан құрамасының қоржынына алғашқы алтынды салды. 

Айта кетейік, сондай-ақ әйелдер арасында 50 келіде бақ сынаған Светлана Акинчева да әлем чемпионатының қола жүлдегері атанды.