Сұлтан Зәуірбек Facebook-тегі парақшасында жазба жариялап, ат мінгізген азаматтарға алғыс айтты.
UFC файтері Шавкат Рахмонов пен кәсіпқой боксшы Сұлтан Зәуірбекке ерекше құрмет көрсетіліп, сәйгүлік сыйға тартылды, деп хабарлайды Skifnews.kz ақпарат порталы.
Сұлтан Зәуірбек Facebook-тегі парақшасында жазба жариялап, ат мінгізген азаматтарға алғыс айтты. Жазбаның астында спортшыларға сыйлық табыстаған сәттің видеосы жарияланды.
"Кішкентай ауыл болсақ та чемпиондарымызға құрмет ерекше. Құдай қаласа, екеуің әлем чемпионы болыңдар. Сендерден зор үміт күтеміз. Ат мінгізіп, шапан жабуды ағайын-туғандардың атынан қабыл алғайсыздар", - деді спортшыларға құрмет көрсеткен азаматтардың бірі видеода.
Айта кетейік, Сұлтан Зәуірбек желтоқсанда Ирландияның Уотерфорд қаласында өткен бокс кешінде екінші жартылай жеңіл салмақта WBA Continental чемпиондық атағы үшін жекпе-жек өткізіп, польшалық Дамиан Вржесинскиден басым түскен еді.
Ал Шавкат Рахмонов 8 желтоқсанда ирландиялық файтер Иэн Мачадо Гэрриді төрешілердің шешімімен жеңді. Осыдан кейін ол UFC-дің жартылай орта салмақтағы рейтингінде екінші орынға шықты.