«Өз атымды ашық қорғауға дайынмын»: Әділет Бәрменқұлов ресми мәлімдеме жасады

Бас прокуратура Қазақстан футболында бұрынғы федерация басшылығы кезінде жасалған бұзушылықтарды анықтаған болатын. Осыған орай ҚФФ-ның бұрынғы басшысы Әділет Бәрменқұлов желідегі парақшасында пікір білдірді, - деп хабарлайды Skifnews.kz ақпарат порталы.

Бәрменқұловтың жазуынша, әліптің артын бағу керек. Өзінің атына тағылған айып негізсіз. 

"Кейбір бұқаралық ақпарат құралында жалған мәлімет таралып жатқандықтан ресми мәлімдеме жасауды жөн көріп отырмын. Бас прокуратура Қазақстан футбол федерациясы мен бірқатар футбол клубына тексеріс жүргізді. Соның нәтижесіне сай Қаржы мониторингі Агенттігі сотқа дейінгі тергеу жүргізіп жатыр.
Алдын ала тон пішіп, тағылған айып пен заң бұзушылықтарды менің атыммен байланыстыру негізсіз. БАҚ пен түрлі блог авторларын, ақпарат агенттіктерін қоғамды жаңылыстырмай, болжам-жорамалдарыңызды таратпауды сұраймын. Қажет болған жағдайда мен тек өз атымды ғана емес, Қазақстан футболын дамыту жолында атқарған жұмысымның нәтижесін де ашық қорғауға дайынмын. Бүгінде кез келген деструктивті сөз менің абыройыма ғана емес, Халықаралық деңгейде еліміздің бүкіл спорт қауымдастығының беделіне нұқсан келтіреді. Тергеу органдарының заң шеңберінде жұмыс істеп жатқанына сенімдімін", - деп жазды ол.