«Дастан Сәтпаев жарақат алды»: Оңалту үшін «Челси» мамандары арнайы келді

Жазда Дастан Сәтпаев кәмелеттік жасқа толған соң, лондондық Челси клубының қатарына қосылады. Осыған байланысты "Қайрат" футбол клубының базасына "Челси" мамандары арнайы келіп, жергілікті жаттықтырушылар штабымен бірлескен жұмысты бастады. Бұл туралы клубтың бақылау кеңесінің төрағасы Қайрат Боранбаев өзінің Instagram парақшасында мәлімдеді, деп хабарлайды Sn.kz ақпарат порталы. 

Оның айтуынша, Алекс пен Сэм "Қайрат" базасында қазақстандық мамандармен бірге кәсіби деңгейде жұмыс жүргізіп жатыр. Әсіресе, олар 17 жастағы шабуылшы Дастан Сәтпаевтың оңалу процесіне ерекше көңіл бөлуде. Британдық мамандар ойыншының жарақаттан кейінгі қалпына келуіне көмектесіп қана қоймай, алаңдағы және жаттығу залындағы дене дайындығын жетілдіру бағытында өз тәжірибелерімен бөлісуде.

Дастан Сәтпаев соңғы рет "Қайрат" сапында 26 қараша күні Чемпиондар лигасының жалпы кезеңінің 5-ші туры аясындағы кездесуде алаңға шығып, бір гол соққан болатын. Кейін жарақатына байланысты алматылық клубтың алғашқы оқу-жаттығу жиынына қатыспады. Ал екінші жиынды мерзімінен бұрын аяқтауға мәжбүр болды.

Дегенмен жас шабуылшының дебюттік маусымы сәтті өтті деуге толық негіз бар. Ол клуб және жасөспірімдер құрамалары сапында 48 матч өткізіп, 19 гол соқты. Бұл көрсеткіш оның болашағынан зор үміт күттіретінін аңғартады.