23 жылда Роналду 234 матчта 146 гол соғып, 45 нәтижелі пас берген.
Криштиану Роналду Португалия құрамасындағы мансабын аяқтағанын жариялаған соң, ел футбол федерациясы аңыз ойыншыға салтанатты қоштасу рәсімін ұйымдастыруға ниетті екенін мәлімдеді, деп хабарлайды Sn.kz ақпарат порталы.
Бұған дейін 41 жастағы «Әл-Наср» шабуылшысы әлеуметтік желіде ұлттық құрамадағы 23 жылдық жолының аяқталғанын хабарлаған еді. Көп ұзамай Португалия футбол федерациясы капитанға арнап арнайы мәлімдеме жариялап, оның ел футболына сіңірген еңбегін ерекше атап өтті.
Федерация Роналдуды ұлттық құраманың символына айналған көшбасшы деп атап, оның жетістіктері мен португалдық жанкүйерлерге сыйлаған эмоцияларын жоғары бағалады.
«Криштиану Роналду – жай ғана көрнекті спортшы емес, шабыт беретін көшбасшы, адалдықтың үлгісі және ұлттық құрамамыздың рухын бейнелейтін тұлға. Ол Португалияның атын асқақтатып, талай ұрпаққа үлгі болды.
Сондықтан оның құрамамен қоштасуы тиісті құрметсіз қалмауы керек. Біз Криштиану Роналдудың ұлы мансабына лайық салтанатты шара ұйымдастыруға ниеттіміз. Жанкүйерлер мен бүкіл ел оған тағы бір мәрте қошемет көрсетіп, алғыс айта алады. Барлығы үшін рақмет, капитан! Ұлттық құрама әрдайым сенің үйің болып қала береді! Енді 1000-голға қарай!» – делінген федерация мәлімдемесінде.
Айта кетейік, Роналду ұлттық құрамадағы алғашқы матчын 2003 жылғы 20 тамызда Қазақстанға қарсы өткізген. Жолдастық кездесуде Португалия 1:0 есебімен жеңіске жеткен. Ол кезде 18 жаста болған шабуылшы алаңға екінші таймда қосылды.
23 жылға жуық ұлттық құрама сапында өнер көрсеткен Роналду 234 матчта 146 гол соғып, 45 нәтижелі пас берген. Ол Португалиямен бірге 2016 жылы Еуропа чемпионы атанып, 2018/19 және 2024/25 маусымдарында Ұлттар лигасын жеңіп алды.