АҚШ-тың Индиан-Уэллс қаласында өтіп жатқан Premier сериясындағы WTA турнирінде қазақстандық теннисші қыздардың 1/64 финалда кездесетін қарсыластары анықталды.
Еліміздің №1 ракеткасы Зарина Дияс әйгілі америкалық теннисші, "Үлкен дулыға" сериясындағы турнирлердің 23 дүркін чемпионы Серена Уильямсқа қарсы өнер көрсетеді. Серенаның былтыр қыркүйек айында дүниеге сәби алып келіп, үлкен спортқа жуырда ғана оралғанын ескерсек, отандасымыздың сәтті өнер көрсетуіне мүмкіндік мол.
Қос теннисшінің арасындағы кездесу 8 наурыз күні түнгі сағат 01:00 шамасында (Астана уақытымен) өтеді. Бұған дейін Дияс пен Уильямс екі рет кездесіп, екеуінде де америкалық теннисшінің мерейі үстем болған еді.
Сондай-ақ, Қазақстанның өзге теннисшісі Юлия Путинцева (81) бельгиялық Элисон Ван Эйтванкпен (50) күш сынасып көреді.