Елімізде жыл басынан бері адам саудасына қатысты 192 қылмыстық iс қозғалған

Бұл туралы бүгiн ҚР IIМ Криминалды полиция комитетi Адам саудасымен күрес бөлiмiнiң қызметкерi Шынар Көшербаева мәлім етті.

— Статистикаға келетiн болсақ, бүгiнгi таңда iшкi iстер органдары адам саудасы бойынша 192 қылмыстық iс қозғаған. Оның 3-еуі адамдарды ұрлауға, 4-еуі адамның бостандығынан заңсыз айыруға, 10-ы адам саудасына, 8-і кәмелетке толмағандарды жезөкшелiкпен айналысуға мәжбүрлеуге, 9-ы кәмелетке толмағандарды сатуға, 11-і жезөкшелiкпен айналысуға мәжбүрлеуге, 148-і «притондарды» ұстауға қатысты, — дейдi Ш.Көшербаева.

Оның айтуынша, әлеуметтiк тапсырыс аясында адам саудасының алдын алуға қатысты 2014 жылы республикалық бюджеттен әлеуметтiк ролик, үнқағаздар мен шетелге шығатындарға арналған ескертпе қағаздар әзiрлеу үшiн 1 млн. 300 мың теңге бөлiнген.

— Адам саудасы құрбандарының басым көпшiлiгi Алматы, Оңтүстiк Қазақстанда жиi тіркеледі. Оның басты себебi, iрi қалаларға адамдар жұмыс iздеп жиi келетiндiгiнде, — дейді  Iшкi iстер министрлiгi өкiлi.