Президент өз ұлын министр етіп қойды

Түркіменстан президенті Гурбангулы Бердімұхамедов өз ұлы Сердар Бердімұхамедовты елдің Өнеркәсіп және құрылыс министрі етіп тағайындады. Бұл туралы 8 ақпанда мемлекеттік БАҚ хабарлады.

38 жастағы Сердар Бердімұхамедов өз ата-бабасы туып өскен Ахал уәлаятының басшысы болып тағайындалғанына бір жыл толмай жатып министр қызметіне ауысты. Түркіменстан президентінің жалғыз ұлының саяси мансабының тез өсуін тәуелсіз бақылаушылар 62 жастағы Гурбангулы Бердімұхамедов билікті тапсыратын мұрагерін дайындап жатыр деп түсіндіреді.

Ахал уәлаятын басқарғанға дейін Сердар Бердімұхамедов осы аймақ жетекшісінің орынбасары, оның алдында елдің Cыртқы істер министрінің орынбасары болып үлгерген. 2016 жылы қарашада ел парламентінің депутаты болып сайланған.

Жаңа қызметінде Сердар Бердімұхамедов Ахал уәлаятының әкімшілік орталығын салу жобасына жетекшілік ететін тәрізді дейді бақылаушылар.
Өйткені, Түркіменстан президенті өткен аптада жаңа қаланы салуға қажетті құрылыс материалдары мен құрал-жабдықты шетелден сатып алуға 1,5 миллиард долларға жуық қаржы бөлу туралы жарлыққа қол қойған.

Президенттің бұл жарлығы үкімет импортты шектеу саясатын жүргізіп жатқан және елде шетел валютасы тапшы болып отырған шақта шықты. Қазір Түркіменстан ел экспортының негізгі табыс көзі – табиғи газ бағасының арзандап кетуіне байланысты, экономикалық дағдарысқа тап болып отыр.

61 жастағы Гурбангулы Бердімұхамедов Орталық Азиядағы табиғи газға бай Түркіменстанды өзіне дейінгі президент Сапармұрат Ниязов қайтыс болған 2006 жылдың желтоқсанынан бері басқарып келеді. Ал Түркіменстан билігін сынайтындар мен құқық қорғаушылар Бердімұхамедовтің билікке келгелі өзгеше ойлайтындарды қудалағанын және айтарлықтай өзгеріс жасамағанын айтады.

Президент Бердімұхамедовтің жалғыз ұлынан басқа үш қызы бар.

Дереккөз: Азаттық радиосы