$ 444.22 € 476.38 ₽ 4.82
Илон Масктің Crew Dragon атты ғарыш кемесі астронавтармен бірге Парсы шығанағына келіп қонды. Әлем космонавтикасындағы тарихи оқиғаны миллиондаған адам онлайн режимде бақылап отырды. Crew Dragon кемесінің 2 тамыз, сағат 05:34 кезіндегі халықаралық ғарыш стансасынан ажырап, Жерге оралу сәтінің тікелей трансляциясы NASA мен Илон Маск компаниясының ресми сайтында көрсетілді.
Айта кетейік, бұған дейін Crew Dragon кемесінің жерге оралатыны хабарланған болатын. Оның бортында NASA ғарышкерлері Даглас Херли мен Роберт Бенкен бар. Crew Dragon кемесінің халықаралық ғарыш стансасынан жерге дейінгі сапары 19 сағатқа созылды. Бүгін алдын ала белгіленген мезет – Нұр-Сұлтан уақытымен сағат 00:48 кезінде кеме су бетіне келіп қонды.
Репортаж коментаторларының айтуынша, ғарышкерлерді SpaceX Go Navigator кемесі мен құтқарушы катерлер күтіп алды. Олар құтқарушы кеменің бортына мінген соң медициналық тексеруден өтеді. Арада 4 сағат өткеннен кейін астронавтар Флоридаға жеткізіледі. Ал Илон Масктің Crew Dragon кемесі бірнеше айдан кейін қайтадан ғарышқа ұшуға дайын болады.
Еске сала кетсек, 31 мамырда Crew Dragon ғарыш кемесінің ұшқаны хабарланған болатын. Ол – соңғы 9 жылда АҚШ-та шығарылған және оның аумағынан ұшырылған алғашқы ғарыш кемесі болды. Америкалық астронавтар Даглас Херли мен Роберт Бенкен 31 мамырдан бері 2 ай бойы халықаралық ғарыш стансасы экипажының құрамында жұмыс істеді және ондағы миссиясын аяқтады.
