Си Цзиньпин Қытай әскеріне соғысқа дайын болу керектігін ескертті

 Гуандун провинциясындағы әскери базаға барған Қытай халық республикасының төрағасы Си Цзиньпин қытайлық сарбаздарға "соғысқа дайын болуға назар аудару керектігін" ескертті. Бұл туралы Sputnik Қазақстан хабарлады.

Сәрсенбіде Шэньчжэнь арнайы экономикалық аймағының құрылғанына 40 жыл толуына орай мерекелік шаралар өтті. Оны Қытайдың орталық теледидары көрсетті.

Си Цзиньпин Қытай армиясының теңіз әскері күштерін тексеру кезінде әскерилерді жоғары дайындықта болуға шақырды. Сонымен қатар, Қытай халық республикасының көшбасшысы әскери қызметкерлер адал, сенімді және мінсіз болуы керек екенін еске салды.

"Сіздер сергек әрі қырағы болып, ақыл-ой мен күш-жігерлеріңізді соғысқа жұмылдыруға дайын болу керексіздер", – деп келтірді телеарна Си Цзиньпиннің сөзін.

Си Цзиньпин теңіз әскері күштерін Қытай армиясының элиталық бөлімі деп атады. Оның айтуынша, әскердің бұл түрі елдің егемендігін, қауіпсіздігін, аумақтық тұтастығы мен мүдделерін қорғауға арналған.