$ 443.35 € 475.54 ₽ 4.82
«Баспана» Ипотекалық ұйымы Алматыдағы «7-20-25» бағдарламасының барлық сатылатын пәтерлері #expohomsters жылжымайтын мүлік жәрмеңкесінде ұсынылатынын хабарлайды. Жәрмеңке 15-16 қыркүйекте «Dostyk Plaza» ойын-сауық орталығында өткізіледі.
Жәрмеңкеге Алматы қаласы бойынша 70-тен астам тұрғын үй кешендерінің өкілдері қатыспақ. Олар барлық келушілерге «7-20-25» бағдарламасы арқылы берілетін тұрғын үй, оны сатып алудың бағасы мен мүмкіндіктері туралы ақпарат беруге дайын.
Сонымен қатар келушілерге екінші деңгейлі банк өкілдері мен «Баспана» Ипотекалық ұйымы мамандары кеңес бермек.
–Тұрғындар тарапынан «7-20-25» бағдарламасы бойынша іске асырылатын тұрғын үй кешендерінің тізімі туралы көптеген сұрақтар туындайды. Әсіресе, Астана және Алматы тұрғындары осы ақпаратқа зәру болып отыр. Мұндай жәрмеңке сатушылар, сатып алушылар мен банкирлерді бір жерде біріктіруге мүмкіндік береді, - деді «Баспана» Ипотекалық ұйымының басқарма төрағасы Қайрат Алтынбеков.
Екі күн ішінде жәрмеңкеге 5 мыңнан астам Алматы тұрғындары мен қонақтары келеді деп күтілуде. Бұл «7-20-25» бағдарламасы бойынша Алматыда пәтер сатып алғысы келгендер үшін таптырмас мүмкіндік.
Естеріңізге сала кетейік, президент Нұрсұлтан Назарбаев биыл наурыз айында өткен парламент палаталарының отырысында «7-20-25» жаңа тұрғын үй бағдарламасын ұсынған еді. Бағдарлама шілдеден бастап іске қосылды. Бағдарлама арқылы Астана, Алматы, Ақтау және Атырау қалаларында тұратын азаматтар 25 млн теңгеден аспайтын, ал, қалған қалалардағы халық 15 млн теңгеден аспайтын баспана ала алады.
