Соңғы бірер жылда Қызылорданың мәдениет саласы жаңа қарқынмен дамып келеді. Өңірде өнерпаздарының республикалық байқаулардағы жетістіктерін айтпағанның өзінде, облыс аумағында бірқатар жаңа мәдени нысандар бой көтеріп келеді.
Облыс бойынша 407 мемлекеттік жүйедегі мәдениет және өнер мекемелері, оның ішінде 171 мәдениет үйлері мен клубтар, 11 музей, 209 кітапхана, 11 архив, Н.Бекежанов атындағы қазақ музыкалық драма театры, облыстық филармония, облыстық халық шығармашылығын дамыту және мәдени-продюсерлік орталығы, тарихи-мәдени ескерткіштерді қорғау жөніндегі мемлекеттік мекемесі және қалалық парк жұмыс жасайды.
1993-1997 оңтайландыру жылдары облыс бойынша 105 кітапхана, 46 клуб мекемесі жабылып қалған. Қазір оның көбі қайта құрылымданып, ел игілігіне қызмет етуде. Тәуелсіздік жылдары мәдениет саласын жергілікті бюджеттен қаржыландырудың деңгейі артып келеді. Облыста 23 типтік жобадағы клуб, 4 музей және Ә.Тәжібаев атындағы облыстық әмбебап ғылыми кітапханасы пайдалануға берілсе, зағип және нашар көретін азаматтарға арналған облыстық кітапхана жаңа ғимаратқа көшірілді.
«Жол картасы – 2020» бағдарламасы бойынша республикалық және жергілікті бюджеттен 54 мәдениет нысаны күрделі жөндеуден өткізілді. Облыстық бюджет қаржысы есебінен облыстық тарихи-өлкетану музейіне жөндеу-реконструкциялау жұмыстары жүргізі-ліп, музей заманауи үлгіде толығымен қайта жабдықталды. Экспозиция залдары кеңейтіліп, қосымша жаңа залдар ашылды. Қорда жинақталған 5 мыңға жуық экспонаттар көрмеге қойылып, жұртшылық назарына ұсынылды. Сонымен қатар бұрынғы әскери комиссариаттың ғимараты реставрациялау және күрделі жөндеуден өткізіліп, онда көркемсурет галереясымен бірге балалар изо-студиясы ашылды. Елбасының тапсырмасымен Қармақшы ауданындағы Қорқыт ата ескерткіш кешенін толық реконструкциялау және жаңғырту жұмысы қолға алынып, толығымен аяқталды. Кешен «ЭКСПО–2017» халықаралық мамандандырылған көрмесі қонақтарын қабылдайтын негізгі нысанның бірі болып белгіленіп, келешекте халықаралық туристік маршрутқа енгізу бағытында жұмыстар жасалуда.
Бүгінгі таңда облыс көлемінде 511 тарихи-мәдени мұра нысандары мемлекет қорғауына алынған. 2013 жылдан бері облыс әкімдігі жанынан құрылған тарихи-мәдени мұраларды қорғау және пайдалану жөніндегі ғылыми-әдістемелік кеңес жұмыс жасайды. Кеңес жұмысының нәтижесінде облыс көлеміндегі мәдени мұраларымызды зерттеу, насихаттау, сақтау бағытындағы жұмыстар бір жүйеге түсіп, бірқатар жұмыстар жүргізілді.
«Мәдени мұра» мемлекеттік бағдарламасы аясында 3 жыл бойы Жанкент, Шірік-Рабат, Сығанақ, т.б. қалашықтарға археологиялық-зерттеу жұмыстары жүргізіліп келеді. Сығанақ, Жанкент қалалары мен Сауысқандық шатқалындағы жартастағы бейнелер кешенін ЮНЕСКО-ның Дүниежүзілік Табиғи және Мәдени мұралар тізіміне енгізу жұмыстарының ғылыми құжаттамалары дайындалды. Сығанақ, Сауысқандық, Жанкент қалашықтары мен Қорқыт ата ескерткіш кешенінің қорғау аймағы белгіленді.
Облыс бойынша ескерткіштерді реставрациялау жұмысы да қолға алынып, нәтижесінде Қалжан ахун медресесі, Бегім ана, Оқшы ата мазары, Ноғай, Ғанибай, Айтбай мешіттері және тағы басқа 34 ескерткішке қайта жаңғырту жұмыстары жүргізілді.
2014 жылы Қазақстан Республикасы Үкіметінің қаулысына сәйкес ондаған жылдар бойы қордаланып келген штат мәселесі де облыс әкімінің қолдауымен оң шешімін тапты. Тек ауыл мәдениетін көтеру мақсатында 410 штаттық бірлік, ал облыстық театр, филармония, музей және ескерткіштерді қорғау мекемелеріне 143 штаттық бірлік бөлінді. 2013 жылдан бері мәдениет және өнер мекемелеріне барлығы 553 штаттық бірліктер беріліп, қажетті мамандармен толықтырылды.
Облыстың халық шығармашылы-ғын дамыту мақсатында облыстық филармония жанынан тұңғыш рет Тұрмағамбет атындағы халық аспаптар оркестрі, камералық классикалық оркестр, облыстық Н.Бекежанов атындағы қазақ музыкалық драма театры жанынан жастар труппасы, балалар шығармашылығын дамыту мақсатында облыс орталығында балалар музыка-лық студиясы және балалар музыкалық театр-студиясы құрылды.
Облыстық филармония ұжымы Түркия, Өзбекстан, Ресей, Татарстан елдері мен АҚШ-тың Нью-Йорк, Вашингтон қалаларында өнер көрсетті. Тәуелсіздік жылдары облыс бойынша бірнеше халықаралық, республикалық, облыстық шаралар дәстүрлі түрде ұйымдастырылып өткізілуде.
Облыстық кітапханада Сыр бойының құжаттық мұраларын сақтау және сирек кездесетін өлкетану қорын интернет жүйесі арқылы кең көлемде қолдануға мүмкіндік беруін қамтама-сыз ету мақсатында «Сырдария» электронды кітапханасы құрылды.
«Мәдени мұра» мемлекеттік бағдарламасы аясында бірқатар тарихи-танымдық кітаптар, айтыстар, жыр мүшәйраларының жинақтары, түрлі альбом-каталогтар баспадан шығарылды. Ел Тәуелсіздігінің 20 жылдығына арналып бірнеше кітаптар мен DVD-дискілер жарық көрді. Жыршы Ж.Аққұловтың орындауында Тұрмағамбет Ізтілеуұлының шығармаларының аудио-оқулығы, Ақмырза Тұяқбайұлының орындауындағы «Сыр саздары» жыр-термелер үнтаспасы, «Тәуелсіздіктің сырлы бояулары», қолөнер шеберлерінің шығармашылығына арналған «Көненің көзі» атты альбом-каталогтар, «Жер кіндігі – Байқоңыр» атты айтыстар топтамасы, ақын Құлан Алдабергенұлының 150 жылдығына арналған «Асылмын әлі күнге танылмаған» атты ғылыми басылым, «Егемен елдің ырғақтары», «Қасиетті топырақтан ашылған қақпа», «Қорқыт және Ұлы дала сазы» сияқты арнайы журналдар жарық көрді. Сонымен қатар Сырдан шыққан 225 ақын, жыршы, жазушы, композитор, әнші, термеші, күйші-домбырашылардың дауыстары енген «Қайталанбас дауыстар» аудиоэнциклопедиясы және Т.Ізтілеуұлының аудармасы бойынша «Шаһнама» эпопеясының музыкалық антологиясы, сондай-ақ жырау Алмас Алматовтың «Шыңғыснама» тарихи дастанымен «Жыр керуені» кітаптары жарық кө-ріп, «Шыңғыснама» музыкалық эпосы аудио-диск түрінде шығарылып, ру-хани қауымға таратылды.
Тәуелсіздік алғанға дейінгі жыл-дары облыс бойынша небәрі 3 архив мекемесі жұмыс жасаған, ондағы сақталған құжаттар – 157 940, қор саны 926 болған. Қазіргі таңда облыстағы архив мекемелерінің саны 11-ге жетті. Бұл мекемелер 90-жылдарға дейін шаруашылық жүргізу есебінде жұмыс атқарса, кейін мемлекет қамқорлығына алынып, облыстық бюджет арқылы қаржыландырылатын болды. Нәтижесінде Жалағаш және Шиелі аудандық архивтерінен басқа барлық аудандық архивтер ғимараттармен, сәйкесінше штаттық бірліктермен, материалдық-техникалық базамен толық қамтамасыз етілді. Мұрағатшылардың зерттеуімен архив қорында сақталған құжаттар негізінде 10-ға жуық кітап, 2 жөнсілтер жарық көрді. Қызылорда облысының архив жүйесі республикада бірінші болып «Электронды мұрағат» ақпараттық жүйесін құрып, қолданысқа енгізді. Облыстық мемлекеттік архивінде сақтаулы тұрған құжаттардың 30 пайызы электронды цифрлық форматқа көшірілді. Облыс әкімінің тікелей қолдауымен облыс орталығында орналасқан архив мекемелерін бір орталыққа шоғырландырып, қор сақтау қоймаларын кеңей-ту мақсатында Қызылорда қаласынан 600 мың сақтау бірлігіне арналған «Мұрағаттар үйі» ғимаратының жаңа құрылысы салынуда.